Health & Family Welfare minister Lalrinpuii chuan nimin khan Aizawl Press Club-ah thuthar thehdarhtute a kâwm a; khaw hrang hranga health clinic sak chungchang sawifiahin, ruahman ang ni loa sate chu an ngaihsak dawn loh thu a sawi. Cancer hospital ṭha leh changtlung zawk buaipui mek a nih thu a sawi bawk.

HFW Minister chuan, health clinic sak chungchang social media lamah sawi a tam thu sawiin, "Sorkar hmasa khan SASCI 2022-23 sum hmangin hmun 235-ah health clinic sa turin a lo siam a, pakhat sakna atan cheng nuai 2.96 ang zela siam a ni a, hmun 60-ah an lo sa zo hman tawh," a ti.

Health clinic sak chungchang a hriat tirha a ngaihtuahna sawiin Lalrinpuii chuan, "Tunah pawh thawktu indaih lohna a nasat laiin, health clinic hmun 235-ah chuan engtin nge thawktu kan dah ang tih a ni," a ti a; sak zawh a nih hunah pawh hmun tam takah thawktu an dah theih dawn loh thu a sawi.

Lalrinpuii chuan, health clinic sakna tur sumte chu health infrastructure thawm ṭhatna atan leh pisa leh quarters chei ṭhatna atantea hman theih dan an zawn thu a sawi a, "Mahse, sorkar hmasain utilisation certificate a lo pek vek tawh avangin tihdanglam theih a ni tawh lo," a ti.

Health Minister chuan, health clinic sak tur atan PWD rate hman lai, SOR 2019 angin ruahmanna (plan & estimate) siam a nih thu sawiin, "Plan leh estimate ang loa sate chu kan entertain dawn lo," a ti a; ruahman ang loa sa an awm a nih chuan a ṭul angin sorkarin hma a lak dawn thu a sawi.

HFW Minister chuan, cancer hospital ṭha leh changtlung zawk an buaipui mek thu sawiin, "Cancer zaitu tur doctor kan neih pawh zai thei turin hmanrua leh thawktu kan pe. December 2024 hi chuan Zemabawkah cancer zai ṭan theih kan beisei," a ti.

Cardio-thorasic surgery leh kidney transplant lamah pawh mithiam an awm thu sawiin Lalrinpuii chuan, "Sorkara la thawk lote pawh lak an nih theihna atan proposal siam turin kan ti," a ti a; theihtawp an chhuah dawn a, a hlawhtlinna an hmuh thuai an beisei thu a sawi.

Lalrinpuii chuan a enkawl department-ah chuan pisa hun vawng dik turin hma an la tih sawiin, "Ka department chan hoah chuan biometric attendance system dah vek turin hma kan la. Chutih laiin, sorkarin KAI application a rawn siam chhuak a, sorkarin mipui tana kan thawhna kawngah min puih kan beisei," a ti.

HEALTH MINISTER SAWI DANGTE

* Preventive care hnuaiah hian vaccination, health screening leh awarness hrang hrang hmangin nasa takin hma

kan la.

* Food safety lamah kan hniam hle mai a, nasa zawka hmalak kan tum. Food Safety Laboratory changtlung zawk kan mamawh a, sorkarah thawktu kan

dil mek.

* Drugs testing laboratory khawl ṭha deuh kan neih pawh thawktu awm loh avangin a function thei lo a, sorkarah kan dil mek.