Liverpool-in 5-0 a hnehna an channa hmun Old Trafford-ah Manchester City-in Inrinni zan khan inkhel thunun chungin mualneitu Manchester United 2-0 in an hneh.
Man United ṭantuten an manager Ole Gunnar Solskjaer ban hun an nghakhlel a, a thlakna tura rinkai zinga mi Antonio Conte chu Tottenham Hotspur-in an lalut tawh - Zinedine Zidane leh Ajax manager Erik ten Hag te sawirik ni mah se Man United-in Norwegian manager ban tum zawngin thawm an la nei lo.
Goal hnih chauh
Ole-a'n Tottenham an hneh ṭuma an formation 3-5-2 an hmang a, Raphael Varane leh Edinson Cavani te an inhliam avangin an aiah Eric Bailly leh Mason Greenwood te a lut.
Manchester City erawh Spurs nena khaikhin chi an ni lo a, Pep Guardiola hote hian ṭan phat aṭangin Man United tlarhnung an tibuai nghal. Minute sarihna lekah Bailly-a'n an lamah a tlawh lut a, David de Gea-a'n Man City player-te goal khung tur a dan hnem bakah Harry Maguire-a'n an lama a ti lut tur ṭha zetin a dang.
Man United tlarhnung a phui lo a, Luke Shaw fimkhur tawk loh vangin Bernardo Silva-a'n minute 45-naah a khung belh a, Man City-in goal hnih an khung theih nan Joao Cancelo a inrawlh ve ve.
Pep-a hoten vawi 16 shot an neihah goal zawnah vawi nga an pet a, goal hnih aia tam khung thei tur an ni. Cristiano Ronaldo-a'n inkhelh ṭantirh lamah ṭha zetin a volley a, hei chiah hi goal Man City goal zawnah an pet. Man United-in Man City goal zawna an pet aiin an goal zawna an pet a tam zawk a, hei hian team pahnih inthlauhzia a sawifiah.
Champion zia
Man City-in fiahna an paltlang a, Crystal Palace lakah vanduai mah se Man United an hneh dan aṭangin champion nomawi humhim turin an ṭha tawk tih an pholang. Pep Guardiola hote hian match 11 aṭangin point 23 an hmu a, hmahruaitu Chelsea point thum chauhin an pha lo.
Mak ang reng tak erawh Man City-in substitution an siam miah lo. Pep chuan, "Pawi ka ti khawp mai. 2-0 a ni a, nuam sa takin kan khel a, thlak a ṭulna ka hre lo a ni," tiin inkhelh banah a sawi.
Beisei pha lo United
Man United-in nipui bazarah Ronaldo, Varane leh Jadon Sancho te an lakluh avangin champion thei tur zingah an inngai a, tun season-ah erawh an elpui dang Man City, Chelsea leh Liverpool te an tluk lo hle.
Ole Gunnar Solskjaer-a hote hian an muala league match hnuhnung paliah chak an nei lo - Aston Villa, Liverpool leh Man City an hneh loh bakah Everton nen an inhnehtawk. Heti chung hian Solskjaer chuan, "Club hotute nen kan inbe ṭha. Man United tan ka thawk a, club tana ṭha ber ka duh a, he hna ka chelh chhung chuan hmasawn zel ka tum," tiin ban tumna a a neih loh thu a sawi.
Man City an hneh loh ṭum hian Ole-a'n bench aṭangin Sancho leh Donny van de Beek te a luhtir a, goal mamawh laia a chhawr ṭhat duh loh player a luhtir hi game thlak danglamna tur ni thei bawk mah se sawisel a tawh nasat avanga luhtir a ni thei bawk.
