Juventus chuan tun season Serie A an match hnuhnung berah Venezia chu 3-2 in an hneh a, Italian football inelna sang berah palina niin season thara Champions League khel turin an tling ta chiah bawk.

Pathianni zan inkhelah Juventus hian minute hnihna lekah goal an chhuah hmasa - Daniel Fila chuan mualneitu lam tan goal a khung a, team lian Old Lady chu dinhmun ṭha lo takah an ding.

Mahse, Turin club hian Kenan Yildiz leh Randal Kolo Muani te hmangin chawlhlawk hmain an chhanglet a, Ridgeciano Haps-a'n rawn khung ve leh mah se mikhual team tan Manuel Locatelli chuan an chak a nemnghet.

Juventus bakah hian champion Napoli, Inter Milan leh Juventus te chuan season tharah European football inelna sang ber an khel dawn a, a tawp ni thlenga beisei nei AS Roma leh Fiorentina te tan erawh hmun a awm ve ta lo.

Juve coach Igor Tudor chuan, "Beiseina leh thil tum bik tak nei chungin Venezia kan pan a, a tir lamah min barakhaih viau mah se kan chhanlet dan khan min ti lawm hle. Season duhthusam kan hmang lo a ni mai thei, a tawpa kan boruak erawh a lawmawm," tiin a sawi.