Horticulture department-in August 16, 2024-a a kalpui ṭan sawhthing tám beihpui thlâkna, 'Operation Ginger 2024 - Fehchhuah Rûnpui' chu ni 12 chhungin khaw 367-a loneitu 5,376 tlawh chhuah a ni tawh.
Horticulture minister Prof. Lalnilawma chuan Vanglaini zawhna chhangin, sawhthing tàmna hmun a tam thu leh Operation Ginger chu August thla chhung kalpui tura ruahman a nih thu a sawi a, "August 16-28, 2024 chhung khan district 11-a khaw 367 kan tuam tawh a, loneitu 5,376-te chu sawhthing tám enkawl dan kan zirtir tawh. Fehchhuah Rûnpui hi August thla chhung neih tur a ni a, report a la rawn luh kim loh avangin hei aia tam hi kan tuam ka ring," a ti.
Thawktu an indaih loh nasat thu sawiin Minister chuan, "Mizoram pumah Block Horticulture Office 26 hawn phalsak kan nih laiin pakua chiah kan indah thei a, thawktu indaih lo chung chungin theihtawp kan chhuah a, report lut chinah khaw 367-a loneitu 5,376 kan tuam tawh a ni," a ti a, an theih chin chinah indaih lo chung pawhin theihtawp chhuah zel an tum thu a sawi.
Prof. Lalnilawma chuan, Fehchhuah Rûnpui chu August thla chhung chauha kalpui tura ruahman a nih avang te, sawhthing tàmna hmun a tam avang leh thawktu an indaih loh avangin Mizoram puma sawhthing tàmna hmun zawng zawng chu August thla chhungin an tlawh chhuak vek thei dawn em tih an hriat theih rih loh thu a sawi a; a ṭul dan a zirin hmalak chhunzawm zel dan tur ruahmanna siam a nih dawn thute a sawi bawk.
Operation Ginger 2024 hi August 16, 2024 khan Horticulture Minister-in a hawng a; Horticulture department-a mithiamte chu district tin tuamin an feh chhuak a, sawhthing tám awmna khuate tlawhin, kut hnathawktute chu sawhthing tâm laka vên dan leh a tám tawhte enkawl dante an zirtir a ni.
Fehchhuah Rûnpui hawnna inkhawm (August 16, 2024) thlenga Horticulture department-in report an dawn chinah, Mizorama khua 263-ah chhungkua 25,102-in sawhthing an chíng a, chhungkaw 6,586-te sawhthing a tám a ni.
