IPR department leh Mizoram Journalists Association (MJA) chuan nimin khan IPR Auditorium-ah National Press Day an hmang a; IPR minister Dr Vanlalthlana'n Mizoram Journalists' Pension Scheme tlangzarhin, MJA member, journalist aṭanga pension turte hnenah pension bu a hlân.
Inkhawm hi IPR director C Lalnunkima'n a kaihruai a, IPR officer-te leh journalist ṭhahnem tak an tel. IPR Minister-in MJA member, journalist nihna aṭanga pension tur mi pariat hnenah pension book a hlân a ni. Pension-te hian September 2024 aṭangin thla tin pension hlawh an la dawn a ni.
Dr Vanlalthlana chuan, khawvelah digital revolution a awm mek tih sawiin, "Journalist-te pawimawhna a pung zel. In mawhphurhna a sang zual sauh a, ṭan lehzual a ngai. Chanchin thar thehdarh danah ṭan kan lak a, kan insiam rem zel a ngai," a ti.
Investigative journalism lamah ṭan lak zel a ngaih thu sawiin Vanlalthlana chuan, "RTI Act a awm tawh a, nasa zawkin investigative journalism lamah i ṭang ang u. Sorkar khalh ngiltu tur leh sorkar tih dik loh hrilhtu tur in ni," a ti a; ramin a mamawh ngaihtuah chung leh khawvel hmasawnna mila thuthar thehdarh turin journalist-te a chah.
IPR Minister chuan, kumina National Press Day thupui, 'Changing nature of the press' tih chu a pawimawh thu sawiin, "Khawvel danglam ang zela kan insiam rem ve a ngai a, ngaihtuahna kan sên nasat a ngai. Chanchinbu hi mi tam takin kan la ngaihlu em em reng a, mipui tan ṭan i la zel ang u," a ti.
MJA president C Lalrambuatsaiha pawhin thu sawiin, "Hmasawnna a awm zel a, hmanrua leh thil thar a awm zel a, media lama tih theih leh hnathawh dante pawh a inthlak zel. Eng hunah pawh awm ila, eng dinhmunah pawh awm ila, thawhrimna leh taimakna hi kan survival chance a ni," a ti. MJA member-te tana Mizoram sorkarin pension scheme a siam leh a taka hman theih a ni ta chu lawmawm a tih thu a sawi.
Press Day hmannaah hian Dr David C Vanlalfakawma, assistant professor, Department of Forestry, Mizoram University-in 'Journalism in the face of the environmental crisis' tih thupui hmangin boruak, leilung, nungcha leh ramngaw chereu mek zel kaihhnawiha journalist-te mawhphurhna leh hmalakna tur pawimawhte a sawi.
Mizoram Journalist Pension Scheme, 2023 hi Mizoram sorkar chuan October 5, 2023 khan Gazette notification a chhuah a; Mizorama khaihlak awm loa journalist hna kum 30 thawk tawh, mihring kuma kum 60 tling tawhte'n an dil thei a ni.
JOURNALIST PENSION-TE
1. C Lalkhawliana, Highlander, Aizawl
2. Sangṭhuama Rawihte, Harhna, Aizawl
3. C Dinthanga, Lelte Weekly, Aizawl
4. Biakkima Renthlei, LPS Vision, Aizawl
5. S Lalhmachhuana, Turnipui, Kolasib
6. K Thangvela, Zobawm, Siaha
7. V Lallianzuala, Lairam, Lawngtlai
8. RC Hranghmingthanga, Zawlbuk Aw, Serchhip
