Mizo nula, Thenzawl Hockey Training Center aṭanga inzir chuak Lalremsiami Hmar chuan Tokyo Olympic 2020 semifinal a khel dawn! Remsiami telna India hmeichhe hockey team hian Australia 1-0 a hnehin a vawi khat nan Olympic semifinal an lut.
Nimin zing quarterfinal inkhel hmuhnawm takah India tan defender Gurjit Kaur chuan penalty corner chhawr ṭangkaiin goal a khung, coach Sjoerd Marijn-a'n a naute a remphui ṭhat avangin team nem zawk India an chak.
India hian August 4, Nilaini zing dar 7:00 hian semifinal-ah Argentina an hmachhawn leh ang, world number 3 hian quarterfinal inkhel dangah number 4 Germany chu 3-0 in an lo sawp ve thung a ni.
FIH Rising star of the Year 2019 Remsiami chuan, "Olympic semifinal hial thlen hi a ropui, medal hlawh chhuak ngei turin theihtawp kan chhuah zel ang. Mizo mipuite min lo ṭawngṭai pui chhunzawm zel turin ka sawm che u," tiin Vanglaini a hrilh.
Hnehna chu...
India hi harsa taka group stage paltlang an ni a, an group match hmasa pathuma an tlawm hnua tho chhuak hram an ni. An khingpui Aussies erawh chak vek chunga tlang an ni thung, semifinal lut tura rinkai zawk pawh an ni.
Inkhelh ṭan hmain India coach Sjoerd Marijn chuan, "Australia hian chak loh an hlau dawn, keini tan chuan hlauh tur a awm ve lo, nuam ti taka inkhelh kha a nimai," tiin a sawi lawk, a sawi ang ngeiin Oi Hockey Stadium-ah a naute a chet tir.
Netherlands leh Germany laka defensive game an tih fuh loh an hrechiang a, world number 2 leh Olympic vawi thum champion tawh ni bawk Astralia chu a tir aṭangin huaisen takin an nawr - ball chang tam hmasa zawk niin hun ṭha pawh an insiam nual.
Goal khat
India captain Rani Rampal-i'n goal bul hnaiah ball per a dawng fuh a, mahse a vanduai - a ball dan per hian goal ban a per keuh. Kolasib nula Remsiami ball hmuh tur chu Rani hian a lo tawk pial hman bawk, a chet fuh ṭum a ni lo.
Group match lama penalty corner chawr ṭangkai hleithei lo India an danglam tawh, penalty corner an hmuh hmasak berah hian Australian player pali karah Kaur-i'n a vaw goal a, goal dang khung belh lo mah se an goal an venghim thei.
India tlang theih chhan pakhat chu goalkeeper Savita Punia a ni. Hockey Haryana player duhlai hian Australia lam goal khung tur vawi tam a dansak a, boruak sang leh khingpui lamin an nawr chilh karah pawh a chiai ve eih lo.
Dai ngai loh
Moscow 1980 aṭang khan hmeichhe hockey hi Olympic-ah telh ṭan a ni. A tirah chuan knock out stage a awm lo, an inkhelh kual hnuah a sang pathumin medal an dawng, a hnu lam Los Angeles 1984 aṭangin knock out stage siam a ni.
India hmeichhe team tan Olympic khelh phak ringawt pawh a harsa, an vawi thum telna chauh a ni. Tun hma lama an la tih theih ngai lo group stage an paltlang a, quarterfinal aṭang kha chuan an thlen chin apiang hi record thar a ni zel tawh.
Semifinal-a an tum tur Argentina hi world number 3 an ni a, an ranking thlir chuan number 9 India aiin an sangin an ṭha zawk. Amaherawhchu, mumang rama cheng lai India nulate hian hlauhna nei loa an khel a nih chuan chak thei an ni.
Mizo nula Remsiami
India team-in match an khelh tawh zawng zawngah Lalremsiami Hmar a la inlan vek, goal hmaah la vannei tawk lo mah se a khel ṭha pawl a ni phak. Kum naupang leh thaza rual a nih avangin goal nawr bakah tlarhnung pui turin a tlan let tam.
Hockey-ah chuan player hi duh zat zat inthlak kual reng theih a ni a, a bikin forward lam hi an inthlak kual zing hle. Jersey number 20 hatu Remsiami pawh tlarhma lamah captain Rani Ramal nen an inthlak kual fo a, an inkawp chang a awm bawk.
Kum 21 mi chauh la ni mah se Siami hian India tan match 60 chuang a khel tawh a, goal 23 khung tawhin tunah chuan India player beiseiawm berte zinga mi a ni mek - coach Sjoerd Marijn pawhin a chungah rinna a nghat ngam.
India tan Olympic khelh phak hi thil awlsam a ni lo - infiamna khawmpui lian an khelh phak ṭuma Mizo nula a tel phak hi Mizo infiamna tan chuan mellung pawimawh tak a ni, medal la thei zingah an la tel a, chumi tur erawh chuan vanneihna an la mamawh.
"India coach khan fak a phu, match hmasa lama an tihsual a siam ṭha thei kha a ropui. India player zawng zawng khan an thawkrim em em a, ball an hloh a nih pawhin lak letsak tumin an bei let nghal zel. Aussies lam kha hmunruak an siamsak duh lo.
"Defender lamin awmze nei loa ball vuak chhuah aiin a sang (over head) a vuak chhuah an ching kha a fuh. Australia lamin min nawr nat vanglaia talbuai lo keeper Savita Punia a fakawm a, Mizo nula Remsiami inkhel a hmuhnawm hle bawk,"
- Lalremruati,
International Hockey Umpire
"Ka naute hnenah engmah hlauh tur a awm lo, nuamti takin inkhel rawh u tiin ka hrilh, chutiang tak chuan an rawn khel chhuak thei. Semifinal luh hi chanchin lawmawm bik a ni a, tunah chuan duhthusam kha a thleng dik mek.
"Tlarhnung lama kan buaina khan kan rem fuh ta, ka naute hian theihna sang tak an nei, a pawimawh lai chu an rilru put hmang hi a ni. 'Chak De India' kha a takin a lo thleng ni berin ka hria,"
- Sjoerd Marine, India Coach
(Chak De! India hi Shah Rukh Khan-a channa hockey film hmuhnawm zet mai a ni a, kum 2007 khan tihchhuah ṭan a ni. SRK hi coach lemah ṭangin India chu World Cup final-ah a champion pui a, final-ah hian Australia an hneh.)
