77th National Football Championship for Santosh Trophy 2023-24-ah Mizoram kalkawng bumboh deuh mah se nomawi kawng an la zawh zel. Manager K. Lalenghluna leh coach Lalsangzuala Hmar hoten kum nga hnua Mizoram final round an hruai thlen hnuin quarterfinal an lut.

Mizoram hian final round lut turin Railways hneh an mamawh a, goal tam an mamawh lo - chak hrim hrim an mamawh. March 2, Inrinni khan Golden Jubilee Stadium-ah Mizoram hian Lalthankima, Vanlalbiaa Chhangte leh Malsawmfela te hmangin goal an khung a, Railways defender Abhishek Aich-a'n an lamah tilut bawkin, 4-0 in Mizoram an chak.

Mizoram an tlusawp

Mizoramin Maharashtra hneh loin bul an ṭan a, hemi hnu hian insiamṭha hret mah se an hun tawna hrehawm ber an tawng. February 29, Ningani khan Manipur lakah 4-1 in an tlawm.

Ṭum dang ang thoin Mizoram hian Itanagar Mizote aṭangin ṭantu an nei ṭha a, mah se Manipur laka mualpho Mizo player tam zawkin an zah avangin anmahni ṭantute pawh hmu ngam loin dressing room an pan nghal.

Stadium aṭanga hotel panna kawng chu ṭum dang zawng aiin a thui a, Mizoram team an tlusawp a ni ber. Amaherawhchu besei tur a la awm miau avangin a hma aia ṭhain an hun neih angte an hmang.

Manipur hneh loh zan aṭangin player-ten coaching staff bulah an phone an thehlut vek a, player-ten phone an kawl tawh loh avangin coach-ten zingah an kai tho vek ta zawk.

Railways khelh dan zir chiangin chumi mil chuan ni khat training hun awm chu hman a ni a, zan lamah India aiawha rugby khel tawh Jeremy Remlalfaka'n fuihna hun a hmang. FCI-a hna thawk tawh Jeremy hian fuihna ṭha tak a sawi a, coaching staff-te rilru hneh lai ber erawh, "Mizoram tana tihram hram kan la hmu lo," tih chu a ni a, Mizoram team ben harhin an awm.

Khingpui zirchianna

Railways-in Mizoram an hmachhawn hmain quarterfinal an lut tawh a, chutihrualin Mizoram an hneh loh chuan National Games gold medalist Services an hmachhawn dawn.

Chutihrualin inelna danah group stage-ah yellow card pahnih hmu hman chu knockout stage-ah hrem an ni dawn. Railways-in Mizoram lakah point hmuh duh mah se an player zinga pasarihin yellow card an hmuh tawh avangin kim loa quarterfinal hmachhawn an hreh.

Railways manager Kasif Jamal chuan, "Dan hi kan hriat a ngai a, kan fimkhur a ṭul hle," tiin inkhelh hmain Vanglaini a hrilh a; Karnataka hnehtu Railways team aṭangin player pariat an thlak. Mizoram hna a awlsam hret a, chutihrualin Mizoram pawhin match hmasa bera Maharashtra an khelh ṭum aṭangin player pariat an thlak ve tho tih hriat a ṭha.

Jersey no. 7

Railways-in group match-a an khelh dan ṭhin ang thoin defensive game an khel a, ball an vawrh nasa bawk. Mizoramin na taka nawr tum mah se Manipur laka an chetsual tawh avangin kawng tam takah an fimkhur.

Mizoramin chance an insiam chho a, goal hmaah an vannei tawk lo. Minute 17-naah Lalengmawia ball vawrh luh chu jersey no. 7 Thathana'n chak taka um lutin goal ṭha bik a khung.

Ainawn rawlthar Thathana hian a goal khung lawm nan van lam hawi chhoin a kut khing hnihin van lam a kawk bawk. Santosh Trophy-a a goal khung lai hmuhsaktu tur pa a nei tawh lo a, chutihrualin a pain hmu ve se chuan a chhuang khawp ang.

Mizoram goal hmaah an vannei lo a; MS Dawngliana thawkrim mah se goal hmaah a vanduai tlat. MC Malsawmzuala, Malsawmzuala Tlangte leh R. Malsawmtluanga te goal hmaah an vannei bik lo.

Hriangtlang tlangval

Mizoramin goal khat chauh an khung avangin Railways-in si phurh sut tumin second half ṭantirh aṭangin substitution an rawn siam nghal a, an goal bawh a na sawt bawk.

Coach Sanga hoten goal chance insiam leh ṭhin mah se goal zawnah ball a kal fuh thei lo. Minute 74-naah Hriangtlang tlangval Mabiaa leh Lunglei tlangval HP Lalremruata te an lut a, an khel ṭha hle.

Minute 81-naah Mabiaa'n Dawngtea hnen aṭanga a ball hmuh chu chak taka um lutin kawh zetin a pet goal. Dinhmun derthawnga ding hman Mizoramin quarterfinal an lut dawn tih a hriat theih bawk. Goal pawimawh khungtu Mabiaa a hunah tak a rawn inlar a, inelna ṭantirh lamah che ṭha tawk lo mah se a discipline ṭhatna chu a hunah tak malsawmin a awm.

Mizoramin nuam sa zawka an khelh theih nan minute 87-naah MS-a ball thawlh ṭha zet chu Railways defender Abhisek-a'n an lamah a tilut - khawih lo se Dawngtea'n a khung tho ang.

Hei le, no. 77

Injury time-ah Mizoramin inkhel tura piang tia chhal theih Malsawmfela an luhtir a, Ramhlun South striker hi a kum upa deuh tawhin, tun hma aiin rit hret mah se hun rei lote chhungin mi bik a nihzia a rawn pholang.

Sawmfela hian Mabiaa ball vawrhluh chu um lutin dinglam kilah Railways defender Abishek a nek tlu tawp a, hemi hnu hian goal lam pan chatin Dawngtea nen wall pass hmangin Railways tlarhnung chiang takin an ṭhiat. Mizoram no. 77 hian a ke chhe lamin (ke vei lam) Mizoram goal lina a khung a, goal lina ni tawh mah se entu mipui thawm a ṭha a, technical area-a Mizoram team zawng zawng an ding vek bawk.

Hetah hian a la tawp lo. Social media lamah Sawmfela goal hian sawizui a hlawh a, Mizo football ngaina chin chuan no. 77 goal khung hi an hmu vek ang, tih theih tur a ni.

Mizoramin hnehna an chang a, inkhelh banah an chet chhiat laia anmahni ṭawiawm tlatu Itanagar-a Mizo awmte nen chak an lawm ho. Coach Lalsangzuala Hmar chuan, "Pahnihna ni mah ila, quarterfinal thleng tur hian dinhmun harsa tak kan paltlang. Heta tawp hi kan duh lo a, nomawi chawi ngei tumin theihtawp kan chhuah ang. Pathian zara tun dinhmun thleng thei hi kan ni a, Mizo mipuite ṭawngṭainaa min hre reng turin kan ngen a che u," tiin Vanglaini a hrilh.