LZ Juice MPL11-ah SYS FC-in hneh loh an tawng a, Lalmuankima hote hi anmahni ang bawka MPL vawi khat khelhna Ramhlun Athletic lakah 2-1 in an chak lo. Player naupang rual awm khawmna SYS hian Mizoram Police hial hneh thei mah se kai thar FC Bethlehem nen an inhnehtawk hnuah Ramhlun lakah an tlawm.

Nimin chawhnuah ruah a sur a, RG Stadium-a inkhelah nghawng a nei. Minute lina lekah Flavius Lalruatkima'n halfway line pelh hret aṭangin freekick a pet a, grass huhah ball sawt tleuin goalkeeper Joseph Laltluangpuia'n a dang lo - SYS keeper-in a hna a ti lo.

SYS lamin minute 69-naah mawi zetin an si phurh an sut a, Ricky H. Vanlalhriatsanga ball vawrh luh ṭha zet chu box chhungah Joel Lalramengmawia'n la thlain si phurh sutna goal a khung.

Goal an khung hnuah SYS an fimkhur tawk lo a, minute khat hnuah Ramhlunin hma an hruai lehnghal. Armed Veng tlangval Optea through ball chu Benjamin Lalnunpuia'n cool zetin a khung a, chakna goal a ni zui bawk.

Ruahsur vangin SYS-in harsatna an tawk a, ball chang tam tho mah se pass sual a tam. Chutihrualin Ramhlun Athletic an khel ṭha hrim hrim a, vanneih ṭum ni se goal tam zawk khung thei tur an ni. Felix Lalruatsanga vanneih ṭum a ni lo a, Serchhip tlangval hian hun chanve hmalam leh hnuhnungah chance ṭha a hlah ve ve.

Danny Lalduhawma kaihhruai Ramhlun hian match nga aṭangin point ruk an hmu a, Mizoram Police leh Sihphir Venghlun nen an point hmuh zat a inang. SYS erawh match hnuhnung pahihah chak hmel hmu lo mah se tun season-ah point 11 hmuin pathumnaah an awm.