Premier League season an ṭan a, inkhel hmuhnawm en turin min hmuak nghal - Pathianni zan dar 8:30 hian Manchester United khelmualah Liverpool an lenglut dawn a, English football mai ni lo, khawvel huap pawha fixture ngaihven hlawh a nih avangin inkhel boruak a 'hot' dawn.

Liverpool-in coach thar Arne Slot hoa season bul an ṭan chungin, beisei aiin bul an ṭan ṭha a, an match hmasa pahnihah an chak ve ve. Chutihrual chuan an team hmachhawn hi Ipswich Town leh Brentford an nih avangin tehna a la tling tawk lo, pawh a tih theih.

Manchester United thuneituten Erik ten Hag-a chungah rinna an nghat a, ban tura sawi a nih laiin contract thar an pe zawk. Mahse, Dutch coach hian team dinna tur khawp hun a nei tawh chungin beisei ang tak chuan Red Devils hi a la chet ṭhatpui lo.

United hian an match hmasa berah Fulham chu 1-0 in an hneh ve mai a, match hnihnaah erawh Brighton & Hove Albion chu 2-1 in an ngam lo nghal. Season ṭantir aṭangin United fans an hnual nghal a, Liverpool an hneh chuan an tan infuihphurna hun ṭha a ni ang.

Beiseina

Liverpool-ah Jurgen Klopp a hlawhtling viau a, mahse, Reds-a kum kua zet hun a hman chhungin Old Trafford-a a record a duhawm lo hle - United khelmuala vawi 11 a lenah vawi hnih chiah a team a chakpui a, uang thei a ni lo.

Hetihrual hian March 2023 khan Anfield-ah United hi 7-0 ngawtin an sawp tih erawh hriat tel sak a ṭha a, Old Trafford-a a record a ṭha lo deuh e, tih mai chauh a ni - chutihrualin Slot hi United khelmuala hnehna hlado sa turin a ṭha tawk ang em, tih chu zawhna awm thei tak a ni.

Slot hian Dutch team AZ Alkmaar a enkawl lai khan Old Trafford hi a lo leng tawh a, khatihlaia Ole Gunnar Solskjaer-a enkawl United chuan 4-0 ngawtin an lo sawp. Mahse, Slot chuan he thil thleng hi theihnghilh a duh.

Dutch coach chuan, "Tunah chuan Old Trafford-a lenpui turin team ṭha zawk ka nei tawh," a ti a, United laka a result hmasa chu tuna an lenluh tur teh nana lo hman rem a ti lo - chak a tum dawn tihna a ni.

A danglam ta

Liverpool hian pre-season-ah khan United hi hmachhawnin, 3-0 ngawtin an sawp a, mahse, Slot-a'n hei hi innghah nan hman a duh lo. Feyenoord boss hlui chuan, "Pre-season ah kha chuan fans ngah zawk kan awm lo a, stadium-a inkhel entu zahve khan min ṭan ve tlat.

"Tunah chuan an khelmualah a ni tawh dawn a, chutiang chu a nih tawh dawn loh avangin pressure a danglam tawh ang. Chu zawng ai chuan player pawh an danglam vek tawh dawn," a ti a, pre-season match aṭanga an inkhel tur teh chi a nih loh thu a sawi.

Slot chuan Liverpool leh United inhalzia a hriat thu sawiin, Reds manager chuan, "Mi ṭhenkhatin he fixture danglam bikzia leh hautak bikzia min hrilh an tum a, mahse, chu chuan ṭangkaina a nei lo.

"Liverpool-ah hna kan thawk a nih chuan, United nena kan inkhel tur pawimawhzia hi chu ka hrethiam nghal," a ti a, hei hian Liverpool leh United inkhel tur pawimawhzia leh boruak sanzia a hrilhfiah.

Salah a dam

United tana thu hriat nuam lo tur chu Liverpool-in player inhliam langsar an nei lo hi a ni - Curtis Jones a inlan theih a rinawm lo a, Reds tan buaina tur erawh a ni lo. Ningani zana lakluh Federico Chiesa chu squad-ah a la awm dawn lo bawk.

Liverpool squad an dam kim tiin a sawi theih a, United tana hriat nuam lo ber tur chu an ngam loh em em Mohamed Salah a dam ṭha hi a ni. Egytpian forward hian tun season-ah match hnih khelin, goal khat ve ve a khung leh der tawh.

United hi a ngam rem rem hle - a hmachhawn hnuhnung 11-ah goal 14 zet a khung a, assist vawi li a nei bawk. A tawi zawnga sawi chuan United vel ṭaptu a ni a, amah thlawp tura Luis Diaz leh Diogo Jota an awm tel avangin United tan a awlsam lo ang.

Reds hian bench aṭanga lut turin Darwin Nunez leh Cody Gakpo an nei bawk a, number 6-ah Ryan Gravenberch a rintlak rih viau a, Wataru Endo a la awm bawk - Merseyside club hian inringtawk takin Old Trafford an pan ang.

Harh a ngai e

United-in an match hnihnaah Brighton & Hove Albion chu 2-1 in an hneh lo nghal a, fans an lungawi lo hle - Brighton laka an goal chhuah dan en ila, tlarhnung a nghet tawk lo tih a lang a, tlarhma nei ṭha Liverpool lakah fimkhur a ṭul dawn.

Red Devils vanduaina pakhat chu, an tlarhnung buaina chingfel tura an lakluh Leny Yoro chu inhliamin, November-ah a lo kir dawn chauh. Mahse, Matthijs de Ligt an neih thar tho avangin fan-ten ETH leh a naute insiamrem tawh turin an beisei ang.

Mason Mount chu hliam vangin a inlan thei dawn lo a, chuti a nih chuan Erik ten Hag tan false 9 anga Bruno Fernandes hman bansan a ṭul ang - chumiin a hrin tel tur chu tlarhmaa Joshua Zirkzee chhawr a ni a, an striker thar hi Liverpool lakah a ruh no leh no loh hriat a ni dawn.

Ten Hag tan Alejandro Garnacho bul ṭantir chu thutlukna fing ni tura ngaih a ni a, Argentine forward hian Reds tlarhnung buaina thlen turin theihna a nei. Midfield-ah United hian Manuel Ugarte an nei thar bawk a, zaninah a inlan chuan Liverpool midfield che rang takte chhu chat turin a pawimawh ang.

Fimkhur rawh!

United team-ah chak mamawh ber thlang dawn ta ila, player-te ni loin Erik ten Hag a ni ang - Liverpool a hmachhawn hnuhnung pathumah tlawm nei lo mah se, game thlir tan erawh a vanneihzia hai tur a awm lo.

Season hmasa league match hnihah team pahnih hi chak zawk awm loin an inhnehtawk a, United-in FA Cup quarterfinal aṭangin Liverpool an pet chhuak bawk - Ten Hag leh a nauten 4-3 in hnehna an chang a, Reds-in an la na hle.

Mahse, hei tak hi Ten Hag-a dinhmun tiṭhatu a ni. FA Cup final hial lut zuiin, Manchester City an hneh a, nomawi an chawi. United-in Dutch coach thlak tur an zawn thuak thuak hnua a chunga rinna an nghah leh chhan pawh FA Cup hi a ni.

Hetihrual hian match hnihah vawi khat an chak loh nghal avangin United fans leh hotuten chik zawkin Ten Hag an thlir dawn a, season ṭan chauh mah se, Liverpool laka an mualpho chuan Dutch coach hi a dinhmun a derthawng dawn.