Mizoram sorkar sum dinhmun a ṭhat loh avangin Mizorama Treasury lian pahnih - Aizawl South leh Aizawl North Treasury-te chuan sum an pe chhuak tawh lo. Hetih lai hian, Treasury-te chu khâr a ni chiah lo.
Vanglaini thu dawn danin, Mizorama Treasury lian ber Aizawl South Treasury chuan sum an pe chhuak rei deuh a, an pek chhuah hnuhnun ber chu July 23, 2022 kha a ni.
Sorkar laipuiin ti tura a tih angin Finance department chuan tun hnai khan centrally sponsored scheme (CSS) sum, Reserve Bank of India (RBI)-a Mizoram account-a awm mekte chu Treasury-te a pek chhuahtir char char a, a dawngtu/ neitu, state nodal agency (SNA) account-ah thun a ni. Tun hnaia CSS sum pek chhuah zat chu vbc. 570 vel a tling tawh.
Hetih lai hian, CSS sum zinga eng emaw zat chu thil dangah hman a nih avangin RBI-a Mizoram account aṭangin CSS sum pek chhuah tur daih sum a awm lo a; sorkar laipuiin state sum dinhmun a chhiata RBI aṭanga sum an pûkna tura ruahmanna a siam hrang hrang hmangin cheng vbc. 237 vel pûk a ni tawh. Hetiang a nih avang hian Treasury-te hian sum pek chhuah tur an nei tawh lo.
Finance department aṭanga thu dawn danin, state sorkarin RBI aṭanga sum a pûk dawn chuan, Special Drawing Facilities hmangin a pûk hmasa ber tur a ni a, a pung pawh a tlem ber. Sum pûk chu a rùl thei lo a nih chuan Ways and Means hmangin pûk leh theih a ni a, chu chu a la rùl thei lo cheu a nih chuan Overdraft hmangin a pûk leh thei. Overdraft hnuah a rûl thei lo a nih chuan state Treasury khàr a ngai tawh ṭhin.
Special Drawing Facilities leh Ways and Means hmanga sum pûk chu ni 90 chhunga rulh tur a ni a, Overdraft hmanga pûk chu ni 14 chhunga rulh tur a ni thung.
Tun dinhmunah Mizoram hian eng hmangin nge sum a pûk tih Vanglaini chuan a hre thei lo a; thu dawnna pakhat chuan Overdraft hmanga pûk a ni tawh ngeia a hriat thu a sawi.
RBI aṭanga Mizoramin sum a pûk a rulh theih hun hnuhnung chu August 4, 2022 a ni a; Overdraft hmanga sum pûk a nih a, August 4, 2022 chhunga a rulh theih loh chuan Treasury khâr a ngai tawh dawn a ni.
Sorkar laipui aṭanga Mizoramin sum a hmuh tur hnaivai, Share of Central Taxes leh Post Revenue Deficit Grant aṭanga sum hmuh tur aiin tuna RBI aṭanga sum a pûk tawh chu a tam tawh zawk nia thu dawn a ni bawk.
