Mizoram hmun kilkhawr leh doctor awm ṭhat lohnaah drone hmanga damdawi semchhuah leh sample inthawn zung zung tum a ni a, March 1 khan Regional Institute of Paramedical and Nursing Sciences (RIPANS) aṭangin hlawhtling taka enchhin a ni.
Ministry of Health & Family Welfare chuan December 20,2023 khan lehkha hmanhmawh (most immediate letter) a tichhuak a, chutah chuan hmun kilkhawr leh hla zawka damlote damdawi mamawh leh thisen sample-te drone hmanga lakhawm a, drone hmang vêka rang zawka pe turin Mizoram sorkar a rawn hriattir.
Ministry of Health & Family Welfare thuchhuah hi Mizoram sorkar leh RIPANS chuan bawhzuiin, RIPANS-ah emaw, ZMC-a khawl ṭha zawk hmanga thisen sample an lo endik hnuah mithiam zawkte'n damdawi an chawh (prescribe) angte drone hmanga pek turin ruahmanna an siam a ni.
Drone enkawl tur hian Mizoram sorkar hnuaia NRHM hnuaia thawk hmeichhia health care worker pahnih chu Guwahati-a AMTRO pilot training centre-ah training tir an ni tawh.
Drone hian a hnuai lamah bungraw phurhna (payload cabin) a nei a, kg. 5 aia rit lo damdawi leh hmanrua a phur thei. He payload cabin hi thermal insulate niin temparature control thei a ni.
Drone hi a thlawhchhuah dawnah a awm hmun aṭangin a kâng chho (vertical take off ) zawngin meter 150 vel a thlawh chhoh hnuah, satellite kaltlangin digital air map-ah chart vek a ni a, service provider-te'n automatic/remote-in an rawn control dawn.
March 1, 2024 khan RIPANS director Prof. Sanjay Dhinkar Sawant leh nodal officer for drone Dr H Lalrinmawia hoin drone hi enchhin a ni a; RIPANS aṭangin boruak mel-a km. 10 a hla, Thingsulthliah PHC chungah thlawhtir a ni a, minute 13 hnuah a thlawhchhuahna hmunah a ṭum (vertical landing) leh a ni.
Drone hi Tech-Eagle Company-in an rawn supply a ni a, hun eng emaw chhung an enkawl zui dawn a; chumi hnuah Mizo hmeichhe pahnih training nei tawhte'n an enkawl zui ang. Drone hi hmun kilkhawr hla zawk km. 100 chin thlawk thei tura duan a ni.
