Mizoram Police chuan thuchhuah siamin, Syria leh Dubai-a Mizo ṭhalai, awmpui (housemaid) hna thawka awm zinga harsatna tâwkte chungchangah Mizoram sorkarin theihtawp a chhuah thu a tarlang.
Police thuchhuah chuan, Mizo ṭhalai ram danga awmpui (housemaid) hna thawkte'n harsatna an tawh chungchang social media-ah tarlan a ni tih tarlangin, "Mizo hmeichhia housemaid pathum E&K Agency, Vaivakawn ten November 6, 2022-a Syria-a an thawn thlakte'n harsatna an tawh chungchanga Mizoram sorkar hma la tâwk lo anga social media-a tarlan hi thu belhchian dâwl lo a ni," a ti.
Police press release chuan, Syria-a harsatna tâwkte Mizoram sorkarin a buaipui dan a sawifiah a, "Mizoram khua leh tui, ram danga hna thawkte harsatna tawh chungchang hi Chief Minister leh Home Minister ten an ngai thutakin, heng case-te hi uluk taka vil reng a ni," a ti a; ram danga Mizo hmeichhia harsatna tâwkte chu a rang thei ang bera Mizorama hruai haw an nih theih nan hmalak zel a ni dawn tih a tarlang.
Syria chu ram buai tak a nih avangin official-a thil bawhzui a harsa a, mahse, Mizo awmpuite an rawn haw theih nana tih tur ṭul angte chu tih zawh thuak tawh a nih thu an tarlang bawk.
Dubai-a harsatna tâwk Lalkhumtiri chu Chief Minister leh Home Minister kaihhruaina in May 9, 2024 khan him takin Mizoramah hruai haw a ni tawh tih Police chuan an tarlang a, "Mizoram sorkar chuan uluk takin he thil hi a chhui zuiin a ngaihven zui zel dawn," an ti.
