Hun rei tak chhung chu hneh taka hmeichhe tennis thunun thei an awm ta meuh lo - tunah erawh Iga Swiatek a rawn lang a, thil a thlak danglam dawn niin a lang. Poland nula hian Coco Gauff hnehin French Open nomawi a chawi.

Inrinni zan Paris khawpuia final khelhah Swiatek hi kawng tinrengin a chungnung, darkar khat leh minute riat chhung lekin 6-1, 6-3 in a chak. A vawi khat nana Grand Slam final kheltu Gauff tan thil a la harsa hret.

June thla tira kum 21 tling hlim Swiatek hian 2020 khan Roland Garros title hi a lo la tawh, tunah a vawi hnih nan a champion. Kum thum chhungin vawi hnih a champion thei tihna a ni a, atan chuan clay court inelna lian hi hmun ṭha a ni tih a nemnghet.

Roreltu thar
Serena leh Venus Williams te hun a liam a, player beiseiawm Naomi Osaka rawn lang lehin hlawhtling chho viau mah se beisei a phak rih lo. Ashleigh Barty hun a inher chhuak a, Australian star hian hmeichhe tennis chu a rawn thunun viau.

Mahse, kumin March thla khan Barty hi a chawl thut! A vanglai takin tennis a chawlhsan a, loh theih lohna avangin khatih laia world number 2 Swiatek chu number 1-ah hlankai a ni a, season a hman ṭhat em avangin a talbuai phah chuang lo.

Seeded pakhatna Swiatek-i'n tun hnaiah inelna a hmachhawn apiangah hlawhtlinna a chang chho zel. French Open hma hian - Doha, Indian Wells, Miami, Stuttgart leh Rome Open khelin a champion vek, tournament parukah a zawnin nomawi a chawi tihna a ni.

Hlawhtlinna a chan theih nan hian a zawnin match 35 a chak, a zawna hnehna chan hnem lamah Serena a khum a, a upa zawk Venus a nihrual chiah. Chak zawn rei Martina Navratilova (74) leh Steffi Graf (66) te erawh a la hlat deuh.

Tun dinhmunah kum 21 mi chauh a la ni a, amah elphak an awm lo. Clay court season an hmang zo a, clay-ah chuan a ṭha takzet. A hmabak chu grass court season a ni dawn, grass chunga inelna lian ber Wimbledon-ah hian season hmasa khan last 16 a thleng.

A puitling tawh
Grand Slam vawi hnih champion tawh Swiatek chuan, "Kum 2020 nen kha chuan a boruak a danglam tawh hle, ka champion hmasak kha chuan point hnuhnung ber ka hmuh thleng khan ka la inringtawk lo a, rilru a phawklek takzet.

"Tunah erawh inrintawkna a sang tawh, inbuatsaihna a ṭhain ka hlauthawng tawh lo. Ka champion hmasak kha chuan vanneih vang anga min sawisaktu pawh an tam, kei pawhin ka ngaihdan a ni deuh. Mahse, tunah chuan ka nihna tak ka ti lang ta," tiin a sawi.

Set hmasa zawk aṭangin inkhel a thunun hneh a, a khingpui Gauff-i service hmasa chhuhsakin 2-0 in hma a hruai nghal thei. Set hmasa zawkah game khat chiah a hloh, inkhel pumpuiah a service vawi khat chiah hloh chungin a chak thei hial.

French Open 2022-ah match sarih a khel a., set khat chiah a hloh. Last 16-a Qinwen Zheng nen an inkhelh ṭumin set khat a hloh ve zeuh tih mai loh chu chetsual a nei meuh lo. Chinese player lakah hian set hmasa hloh mah se, a hnuhnung pahnihah chiang takin a chak.

Roland Garros chauh ni loin, tournament a khelh hnuhnung ho chhut kir pawhin a sulhnu a nep lo. Set a khelh hnuhnung 58 zinga 56 a la thei. Swiatek chuan, "Final pawh match dang ang thoin ka khel," tiin a sawi, a inringtawk takzet.

Gauff a lungawi
A chak lo zawk ni mah se Coco Gauff chu a thlen chinah a lawm. American tleirawl hian French Open hmasa khan high school a zo ve chiah a, a diploma certificate nen thla a la, tunah chuan silver medal nen thla a la chhunzawm thei ta.

Kum 18 mi Gauff chuan, "Final kan khelh ṭan hma kha chuan ka hlauthawng miah lo, mahse game ka hloh hnek bakah set khatna ka hloh hnu kha chuan engkim a harsa tawh, inrintawkna neih let leh chu a harsa.

"Ka ball vuak a dik loin tihsual ka ngah em em a, nidanga ka khel ka phak lo. Ka khelh ṭhat loh chhan chu Iga Swiatek ṭhat vang a ni, ani khan harsa tak zelin ball a rawn vaw phei thei, a awlsam lo a ni," a ti.

A chak loh avangin a hnuk a ulh a, mittui tla chungin a ngam loh Swiatek lawmpuina thu erawh a sawi thei tho. Gauff chuan, "Zing khua a lo var a nga, lawm takin ka tho leh ang. Ka thlen chin leh phak chinah hian ka lawm," tiin a sawi.

Gauff-i hming hi tennis khawvelah a mikhual lo, kum 15 mi chauh a nih lai aṭangin hriat a hlawh tawh. Tunah kum 18 mi chauh a la ni a, major tournament final a khelh hmsak berah hlawhtling nghal lo mah se hmabak êng tak a nei tih erawh a chiang.