Hun rei tak chu Jurgen Klopp-a enkawl Liverpool leh Arsenal khaikhin an ni ngai lo. Mahse, Mikel Arteta-a'n a duh ang taka team a tuai hnum hnuah chuan Gunners hi Liverpool elpui zinga mi an ni leh ta a, Arsene Wenger-a vanglai ang maiin Arsenal an hmuhnawm leh ṭan ta.
Premier League-ah team pahnih hi champion tumin an inel a, Manchester City an tel bawk. FA Cup lamah pawh Arsenal leh Liverpool an inel zel a, Pathianni zan dar 10:00 hian FA Cup third round-ah Gunners-in Liverpool an mikhual dawn.
FA Cup third round hi double leg a ni lo a, mahse, an in draw erawh chuan replay khelh tur a ni - team pahnihin match khelh tur tamzia an hre ve ve a, replay khelh kher ngai loa match khata chinfel an duh ang.
Liverpool aiin Arsenal an vannei zawk - a chhan maw? Emirates Stadium-a inkhel tur an ni a, mahni muala an khelh dawn miau avangin Gunners-in fan-te puihna nen Liverpool lo hneh theih an inbeisei dawn.
Beiseina thar
December 23 khan Anfield-ah Liverpool-in Arsenal an mikhual a, Premier League match a ni. Reds-in hnehna chang se chuan table chung ber luah mai tur an nih laiin an chak zo lo a, Arsenal nen 1-1 in an inhnehtawk.
He result avang hian Arsenal-in table chung ber luah chungin Krismas an hmang a, an hlim chhung erawh a rei lo takzet. Gunners hi match hnih a zawnin an tlawm zui a, kum thar a herchhuah meuh chuan table-ah palina an ni a, Liverpool chu hmahruaitu an ni.
Arsenal-in an inrintawkna nei let turin chak an mamawh a, match hnih a zawna tlawm hnua Liverpool 'ber kher' hmachhawn hi thil châkawm niin lang lo mah se, Klopp-a team hi an hneh ngat chuan inrintawkna nasa tak an neih belh dawn.
Arteta pawhin he hun ṭha hi bawhpelh a duh lo ang tih a chiang a, FA Cup aṭanga Liverpool mangṭha a, hnehna hlado chham khum a châk dawn - zaninah team pahnihin chak an mamawh ve ve a, Arsenal mamawhna hi a sang zawk, ti ta ila, thu uar kan ni lo ang.
An kim lo
AFCON leh Asian Cup khelh a ni dawn a, player inhliam an awm bawk - Arsenal pawh a tuartu zingah an tel a, player kimin Liverpool an mikhual thei dawn lo.
Egyptian defensive midfielder Mohamed Elneny chu AFCON khel turin a zin chhuak a, Gunners-ah hmun pawimawh a chan phak loh avangin Arteta tan lungngaih phahna tur erawh a ni lo.
Arsenal hian Thomas Partey leh Fabio Vieira pawh hliam vangin an chhawr thei dawn lo a, anni pawh buai phahna tur an ni lo. "Arsenal an kim lo" kan tih rualin player awm lo zingah team tana chhiatpui tham khawp sawi tur an awm lo a, Liverpool aiin chakna chance an nei sang zawk.
Hetihrual hian Oleksandr Zinchenko chu hliam vanga inlan lo tur a ni a, Japanese defender Takehiro Tomiyasu chu Asian Cup khel turin a zin bawk - anni pahnih awm lo hi a pawi ve thei.
A bul ṭanna
Tun hnaia Liverpool ti 'Liverpool' tu chu Mohamed Salah tih loh rual a ni lo a, mahse, AFCON khel tura a zin a ngai - Arsenal tan Liverpool tum dawna hei lo liama thu ngaihthlak nuam a awm chuangin a rinawm lo a, tun season-a goal 18 leh assist vawi kua nei tawh Salah tel loin Liverpool an hriam lo sawt dawn.
Reds manager Klopp chuan, "A tel loa hun hman kan zir ang," a ti a, Arsenal hi Salah tel loa nunchan an zir ṭanna tur chu a ni - tute emaw ngaihzawng ṭhen hlim ang maiin an men puai lo tura ngaih a ni!
Tun hnaia Liverpool result neih ṭhat chhan chu Wataru Endo a ni a, mahse, Japanese midfielder hi Asian Cup khel turin a feh chhuak a, Hungary captain Dominik Szoboszlai chu hliam vangin a inlan theih a beiseiawm lo bawk.
A tawi zawnga sawi chuan Arsenal aiin Liverpool player inlan lo tur an hrawl zawk a, Gunners tan tun hi Liverpool laka an theihna pholan hun chu a ni - a hmuhnawm ang.
Inkhel dang
Ningani zan khan Crystal Palace chuan Everton an mikhual a, 0-0 a an inhnehtawk avangin Goodison Park-ah replay match khelh tur a ni ang. Nizan khan Tottenham Hotspur leh Burnley inkhelin, an result kan hre hman lo.
Zanin dar 6:15-ah tun hnaia result nei ṭha lo Newcastle United an inlan dawn a, Sunderland an lenchilh dawn - Eddie Howe-a team tan insiamremna hun ṭha a ni a, chhawr ṭangkai an tum ang.
Chelsea chuan zan dar 11:00-ah Championship club Preston North End an mikhual dawn a, Stamford Bridge-a inkhel tur an nih avangin fan-ten chak loh lam an ngaihtuah lo ang.
Manchester City chu Pathianni zanah an inlan dawn chauh a, zan dar 7:30-ah Huddersfield Town an mikhual ang. Manchester United chu Thawhṭanni zanah inlanin, zan dar 1:45-ah Wigan Athletic an lenchilh ve dawn thung.
