3rd NorthEast Olympic Games 2024-ah Mizoramin Santosh Trophy-a an hneh loh Manipur lakah phuba an la a, 4-0 in an sawp. Lalbiaksanga Colney kaihhruai Mizoram team tan F. Lallawmkima'n goal hnih a khung bakah Malsawmfela leh Lalbiakhlua (Hlutea) ten goal khat ve ve an khung.

Sikkim an inhnuhdawh avangin group B-ah team pathum chauh an awm a, vawi khat inkhelh chhuah zawhah a sang pahnihin semifinal an lut dawn. Mizoram hian vawiin chawhma dar 9:00 hian Assam an hmachhawn lehnghal dawn a, point an hmuh hrim hrim chuan semifinal an lut ang.

Santosh leh NE Olympic

Santosh Trophy final round-ah Mizoram leh Manipur group khatah an awm a, inkhel pawimawh takah Manipur-in 4-1 zetin Mizoram hi an sawp. Tun ṭumah hian Manipur squad hi a la ngai deuh reng a, chutihrualin Arunachal Pradesh-a an intawn ṭuma man of the match leh goal hnih khungtu Sanathoi Meetei a tel lo. Sanathoi hi Santosh Trophy-a a chet ṭhat avangin India Under 23 atan koh a ni.

Sanathoi awm lo hi Manipur tan chhuanlam a tling lo a, NE Olympic-ah player 20 hruai theih a ni a, Santosh Trophy-a player-te tho an hruai. Mizoram erawhin Mizoram Police behchhanin team an din a, MPL10 champion bakah Vanlalthanga, Ramngaihsanga leh Isak Malsawmkima te an koh belh. Player pathum bakah Santosh Trophy-a Police player parukten bul an ṭan vek a, Lalruatpuia leh Lawma ten bul an ṭan bawk.

Sawmfela Show

NAPTC, Chumoukedima-ah Manipur leh Mizoram te an inkhel tawk viau a, Mizoramin chance an nei ṭha hret. Box pawn chiahah freekick an hmu a, Malsawmfela'n a khung lo. Mahse, first half hun pek belhah Manipur goalkeeper tihsual nang fuhin Sawmfela'n goal hmahruai a khung.

Second half-ah erawh a tisual ni tawh loin Mizoramin mawi zetin Manipur tlarhnung an ṭhiat. Minute 42-naah Lalbiakthanga ball vawrh luh chu box chhungah Sawmfela'n la thlain, ball fing zet a pe chhuak a, Hlutea'n a pet goal. Sawmfela ball pek tluk zetin Hlutea a tlan ṭha.

Mizoram tan bench aṭanga lut Zaithanmawia a che ṭha a, goal hnuhung pahnih hi Zaia siamsak ve ve niin Lawma'n a khung ve ve. Goalkeeper F. Lalmuanawma nau Lawma hi Police-in MPL10 an champion-na kawngah player pawimawh a ni a, Sawmfela bula a tal tam hnuah player thawkrim ni ringawt loin goal hmaah a hriam ta hle.

BS-a a lawm

MPL10-a Mizoram Police champion puitu leh All India Police hnuhnung bera Mizoram Police champion puitu Lalbiaksanga Colney chuan, "Kan result-ah kan lawm khawp mai. Kan khel ṭha zawk a, chak kan phu zawk. Sumo leh train chuang kan nih avangin zing lama thlan kan titla sek kha kan hlawkpuiin ka hria," tiin Vanglaini a hrilh.

NorthEast Olympic hi SportsCast India YouTube-ah pekchhuah a ni a, vawiin chawhma dar 9:00-a Assam nen an inkhel tur pawh a en theih ang. Group A inkhelah Nagaland-in Tripura 1-0 in an hneh hram a, Arunachal Pradesh-in Meghalaya 2-1 in an hneh bawk.

Zanin dar 6:30-ah Mizoram Vs Meghalaya

3rd NorthEast Olympic Games 2024-ah Mizoram volleyball mipa team chuan zanin dar 6:30 hian Meghalaya an hmachhawn dawn. Mizoram hi Tripura leh Manipur te nen group khatah an awm a, nizan khan Tripura nen inhmachhawnin result kan hre hman lo.

Group khat aṭangin team pahnih tlang tur a ni a, Mizoram hi group match hnuhnung berah Manipur nen March 21, Ningani tlai dar 3:00 hian an inkhel ang. Mizoram hi Lalhmangaiha leh Laltlanmawia (Donald) ten an hruai a, NorthEast Olympic hi SportsCast India YouTube-ah a en theih.