3rd NorthEast Olympic Games 2024 chu March 23, Inrinni zan khan a ṭiak ta, inelna hi March 18-23, 2024 chhung khan Nagaland-a district pathum Kohima, Dimapur leh Chumoukedima-ah neih a ni.
Mizoramin gold 17 an hlawh chhuak a, inelna vawi thum an neih tawha gold medal an hlawhchhuah tam ber ṭum a ni a, silver 15 leh bronze 27 la bawkin a vaia medal an lak zat chu 59 a ni.
Mizoram Chef de Mission hi MOA vice president Lallianṭhuama (Sentea) a ni a, Deputy CDM hi Joseph Thansanga (MOA Joint Secretary) leh Lalduhkima Sailo (USAM general secretary) te an ni bawk.
Manipur an champion
Manipur-in state chhung buaina karah NorthEast-ah an chungnung ber tih an lantir a, medal 130 hlawh chhuakin gold 52 an la, silver 15 leh bronze 27 an la bawk.
Chutihrualin ram buai vangin harsatna an tawk ngei tih a lang a, inelna hmasa pahnih an champion ṭuma an chungnung angin an chungnung tawh lo. Tun ṭumah hian Nagaland leh Assam ten Manipur aiin medal an la tam zawk a, gold medal an la tlem zawk thung.
Inelna thlan thiam
Mizoramin football, basektball leh volleyball te a ngaihlu a, NE Olympic Games emaw National Games emaw pawh ni se medal a tam lo.
Tun ṭum inelnaah Mizoram tan wrestling leh boxing ten medal an la tam a, 13 ve ve an la. Gold medal pali latu wrestling-in Mizoram tan gold an la hnem ber a, boxing-in gold pathum lain kum hmasa lam an pha lo.
Chutihrualin inelna thlengtu lamin vanneihna an nei a, tun ṭuma inelna thlengtu Nagaland pawhn an ṭhatna pencak silat an telh vang a tih theih. Nagaland hi a pumpuiah pahnihna an ni hial.
Pencak silat-ah hian medal 28 lak theih a ni a, Nagaland hian medal 27 an la pha a, hei hian an dinhmun a tiṭha. Chutihrualin infiamna dangah pawh hma an sawn tih a lang thei bawk.
Mizoram dinhmun chu
Mizoram hian kum 2018-a Manipur-a inelna neih ṭum khan medal 52 an la a; gold pariat, silver 15 leh bronze 29 an la, a pumpuiah palina an ni. Kum 2022-a Meghalaya-a inelna neih a nih khan Mizoram hian medal 106 ngawt an la a; gold 16, silver 30 leh bronze 60 an la. Chutihrualin NE Olympic vawi hnihnaah hian medal lak tur a tam hrim hrim bawk.
Kuminah Mizoramin coaching staff chhiar telin infiamna 13-ah infiammi 181 an tir a, gold 17 hlawh chhuakin gold medal lak tam ber ṭum a ni a. NorthEast state pariat zingah palinaah an chho leh ta bawk.
Gold 17 bakah hian silver 15 leh bronze 27 te an la a, a pumpuia medal lak zat chu 59 a ni. Mizoram hi che ṭha mah se tun aia result ṭha zawk pawh la nei thei an ni a, state association chak leh chak lo thliarna ṭha tak a ni.
Kuminah basketball, volleyball, table tennis leh badminton ten mipa team inelnaah gold an la vek a, gold la thei association ten tualchhungah inelna ṭha tak an kalpui vek. Hei hi Mizoram tana malsawmna thlentu an ni.
Medal tamna boxing, wrestling, taekwondo leh wushu te pawhin gold an la vek a, hma la sawn thei an ni vek bawk. Heng association-ten kawng dik an zawh leh thawhrim hi a pawimawh hle.
Kuminah boxing-in inelna hmasa an pha lo nasa a, NE Olympic leh National Games zawng zawng hi amateur inelna vek a nih avangin tualchhung lama professional boxing kalpui nasat vang a ni thei a. MIZBA an ṭan nasat a ṭul hle.
Inelna ngaihhlut football-ah Mizoramin gold a la lo a, Manipur hneh loin silver medal-ah lungawi a ṭul. Mizoram Football Association tan insiamṭhat a ṭul niin a lang a, Covid-19 hri leng hnua Mizoram Premier League inelna a tlak hniam vanga ngaih theih a ni.
