Andy Murray a ṭap - a ṭanpui Dan Evans a ṭap bawk. BBC television presenter Clare Balding pawhin a mittui a dang zo lo, a biangah a luang ve bawk; an ngaihsan leh ṭan rawn Murray a herliam meuh chuan an lung a chhia a ni.
Paris Olympic 2025 neih dawn khan Murray hian a hun hnuhnung tur a nih thu a sawi a, tunah chuan Great Britain tana a feh chhuah pui Evans nen quarterfinal-ah an tla a, inelna an mangṭha.
Murray-a tennis match hnuhnung berah hian American mi Taylor Fritz leh Tommy Paul te ṭangdun chu 6-2, 6-4 in an hneh lo. Tun ṭumah hian medal hlawh chhuak ta chiah lo mah se, tun hma lama a sulhnute avangin British mite thinlungah erawh a tla na reng tawh dawn a ni.
A vanglaia world number 1, inelna lian Grand Slam huanga vawi thum champion tawh a nih bakah an ram Great Britain tan 2012 leh 2016 khan singles huangah gold medal a la, mixed doubles huangah 2012 khan silver medal a la bawk.
Murray tawpna
Court Suzanne Lenglen a chhuahsan dawnin, a hmuna inkhel entute chuan zahna chibai an buk a, an khingpui Fritz leh Paul te pawhin ding chungin mipui hi an lo zawm, a hun hnuhnungah zahna a dawng ṭha hle.
Kum 37 mi Murray chuan, "Competitive match ka khelh hnuhnung ber a ni ta a, rilru pawh a khawih hle. Mahse, a hnuah chuan rilru fimin thil ka ngaihtuah a, hei leh chen zinkawng nuam tak ka zawh a lo tawp ve ta hi ka lawm," a ti.
Lawn Tennis Association (LTA) chief executive Scott Lloyd chuan, "Andy hi kan ramin tennis player a neih ropui ber a ni. Britain infiamna huangah chuan hmun pawimawh a chang kumkhua tawh ang," tiin a thlah.
Murray hian major title pathum a lak bakah Olympic gold medal vawi hnih a lak theih avangin a sulhnu hi a ṭha hle a, an rama mi hmingṭhate an pek ṭhin 'Sir' nihna hial an pek a nih avangin Britain miten an ngaihsan dan chu a hriatthiam theih ang.
Tennis player ropui bik Roger Federer, Rafael Nadal leh Novak Djokovic te nen an vanglai a inrual a, anni ho bakah hian Grand Slam vawi thum champion Stan Wawrinka a awm bawk, anni ho zinga a hlawhtling thei a nihna hian a theihna sanzia a ti lang bawk.
Djokovic leh Alcaraz
Mipa singels lamah, a vawi khat nana Olympic champion nih tum Novak Djokovic a la chak zel - Serbian star hian a khup hliam vangin harsatna tenau tawk mah se Stefanos Tsitsipas chu 6-3, 7-6 (3) a hnehin semifinal a lut.
Kum 37 mi Djokovic hian final lut tur chuan Lorenzo Musetti a paltlang leh a ngai dawn a, a hna a hautak chho dawn hle. Semifinal lehlamah Carlos Alcaraz leh Felix Auger-Aliassime te an inhmachhawn thung ang.
Grand Slam vawi 24 champion tawh Djokovic hi June 5 khan a khup hliam zai a ni a, a hnuah Wimbledon khelin final a lut - Pairs Olympic pawh ṭha takin a khel a, medal beiseina a nei sang chho rih hle.
Quarterfinal inkhel dangah Carlos Alcaraz chuan United States mi Tommy Paul chu 6-3, 7-6 (9/7) in a hneh a, Spanish star hian Olympic a khelh hmasak berah medal la turin kawng dik a zawh.
Alcaraz leh Djokovic te hi an chak chho zel a nih chuan final-ah an intawng dawn. Hmanni lawka Wimbledon final khel pahnih hi an intawng leh a nih ngat chuan a hmunnawm khawp ang.
