Assam sorkara Additional DGP pakhatin Saihapui-V khuaa Mizo IR police duty-te an awmna hmun chhuahsan tur leh darkar 24 chhunga an chhuah loh chuan an inkah tur thu a sawi avangin, inkap thei turin nimin khan Mizoram police-te leh mipui an inbuatsaih. Home minister Lalchamliana chuan, ramria Mizo IR sipaite hnuh lêt tumna an la neih loh thu Vanglaini a hrilh.
Nilaini khan Assam Addl. DGP hoin Cachar DC leh official eng emaw zat chu Saihapui V-ah kalin, tun hnaia Saihapui V-a Assam sikul sak bomb hmanga tihchhiat an enfiah. Addl. DGP chuan, Saihapui V-a IR duty-te chu darkar 24 chhunga an inhnuhkir loh chuan sipai tam tak tirh a tum thu leh inkah a ngaih tur thuin a vau a ni.
Assam Addl. DGP thusawiah hian an lungawi loh avangin Vairengte Joint VC chuan nimin khan pawl hrang hrangte SDO conference hall-ah meeting an neihpui.
Mizo IR sipai ṭanhmun tur siama khawtlang huap hnatlang neih an rêl a, information mike kaltlangin hnatlanga chhuak turin mipui an sawm nghal.
Rengkhawpui chanchinbu editor Lalengkima Colney hnen aṭanga thudawn danin, Vairengte VC-te chu hmun hnihah inṭhenin, VC-I huam chhunga mite chu Vairengte auto-rickshaw stand thlangah an hnatlang a, VC II, III leh IV chhunga mite chu Saihapui-V lamah an hnatlang thung. Vairengte auto-rickshaw stand thlangah hian mihring bakah JCB hmangin inkahna a thlen palha police-te ṭanhmun tur siam a ni.
Saihapui-V lamah pawh Vairengte mipui ṭhahnem tak an hnatlang a, Saihapui-V mipuite nen police-te ṭanhmun tur an buatsaih. Saihapui-V mipuite chu a ṭul ang anga che thei turin an inbuatsaih bawk.
Police-te chuan thuthar thehdarhtute zawhna chhangin, ram leh hnam tan eng pawh hmachhawn turin an inhuam a, an zâm loh thu an sawi hlawm.
Vairengte ṭhutchilhtu Kolasib SP Vanlalfaka Ralte chuan, Assam sipaite inkâp tura an lo lan a, silai an hmet puak a nih phawt chuan chhàn lêt ngei an tum thu a sawi a, "Inkâp tur hian sipai pawh kan ṭhahnem tâwk," a ti.
Hetih lai hian, Assam Addl. DGP hun tiam chu nimin tlai dar 2 vel khan a tàwp a, he thu ziah lai thleng hian Assam police lam inlan an awm lo. Official ṭhenkhat chuan, Addl. DGP hian IR duty a vauna chu a sawi lo niin a ṭang leh niin an sawi.
Ramria buaina avang hian nimin tlai khan Home minister hoin chief secretary Lalnunmawia Chuaungo, DGP SBK Singh bakah, Home leh Police hotute an ṭhukhawm. Ṭhutkhawm zawha Vanglaini palai zawhna chhangin Home Minister chuan, "Ramria IR police-te hnuh lêt lam ngaihtuahna a awm rih lo," a ti.
Lalchamliana chuan, Assam Addl. DGP thusawi chungchang an hriat veleh Mizoram DGP chu Assam DGP be nghal tura a hrilh thu sawiin, "Assam sorkar nena inbiak tumna keini lam chuan kan nei rih lo," a ti a; Ministry of Home Affairs Secretary lam erawhin nizan khan state pahnih Chief Secretary-te a biak dawn thu a sawi.
