Supreme Court judge Justice Uday Umesh Lalit, National Legal Service Authority (NSLA) chairman ni bawk chuan Mizoram a rawn tlawh a; November 5-6 khan Reiek leh Rawpuichhipah Cleanliness Drive cum Legal Awareness Campaign a hmanpui.

Reieka Cleanliness Drive cum Legal Awareness-ah Justice Uday Umesh chuan, Mizoram a thlen tirh aṭanga a mit la em emtu chu faina lama Mizoram hlawhtlinna a nih thu sawiin, "Kawng dung a fai hle. Mipui hmél hmuh a nuam a, mipui khawsak phung pawh a felfai. Mizo mipui mizia leh rilru put hmang a dik avangin faina kawngah tun aiin hma a la sawn ngei ka ring," a ti.

NSLA Chairman chuan, rorelna dik mi tin pek a nih theihna turin a puanzar hna Mizoram State Legal Services Authority (MSLSA)-in a thawh tawh leh thawh mek chu a ṭha hlea a hriat thu sawiin, "Dan hre mite rawihna nei lo tan MSLSA a awm a ni tih mipuiin zau zawka an hriat a ngai," a ti a, MSLSA chu ṭang sauh sauh turin a chah.

Rawpuichhipa hun a hmanpuinaah Justice Uday Umesh Lalit chuan, a thlawna dan chungchanga inpuihna (legal aid) dawn chu khua leh tuite constitutional right a nih thu a sawi a, "Hei hian mi tin a thleng phak ngei tur a ni. Hemi kawngah hian legal services authority hi a pawimawh a, campaign kaltlang hian mipuite'n dan hnuaia an dikna leh chanvo dik tak an hre thei a ni," a ti.

Campaign-ah hian Gauhati High Court judge pahnih Justice Michael Zothankhuma leh Justice Nelson Sailo ten Mizorama thubuai dinhmun leh dan leh hrai chungchanga mipui hriat tur pawimawhte an tarlang.

Aizawl district chief judicial magistrate Julie Lalrinzami, Aizawl District Legal Services Authority secretary ni bawkin The Mizo Marriage, Divorce and Inheritance of Property Act, 2014 chungchang a a sawifiah a; social media-in a hrin chhuah inpuh hmingchhiatna a pawi theihziate leh dan hnuaia hremna te, POSCO Act, 2012 chungchangte a sawifiah bawk.

NSLA Chairman hi NLSA member secretary Ashok Kumar Jain leh NLSA director Puneet Sehgal ten an ṭawiawm a ni.