May 27, 2022-a Excise & Narcotics department (END) enforcement-te'n Millennium Centre (MC)-a grape wine an mansak neitute chuan END-te'n zu an mansak loh thu an sawi. MC Authority hotute pawhin MC-ah hian zu an zawrh an rin loh thu Vanglaini an hrilh.
Tarlan tawh angin, END minister Dr K Beichhua chuan grape wine mantu END mite chu grape wine man tuma kal an nih loh thu leh, grape wine phênah whiskey leh Korean wine man tur tam tak a awm thu a lo sawi tawh.
Vanglaini palai zawhna chhangin MC-a grape wine zuartute chuan, END-te'n zu an mansak loh thu an sawi a, "Man turin zu kan zuar lo hrim hrim. Kan grape wine min mansak avanga kan rilru nat tawh nâk alaiin, END Minister thusawi kan hriat khan kan rilru ná a zual hle. Khatianga a sawi ta mai kha mak kan ti hle a ni," an ti.
Grape wine zuartute chuan, wine chu a rûk a rála zuar an ni lo a, langsâr taka an zawrh thu sawiin, "Rei tak kan zuar tawh a, harsatna kan tâwk ngai lo. Mansak kan ni thut kha mak kan ti hle," an ti a; grape wine-te chu sorkarin pe kîr leh ngei se an duh thu an sawi.
MC Authority hotute pawhin Vanglaini palai zawhna chhangin, MC-ah zu zawrh a nih an rin loh thu an sawi a, "Ruihhlo zawrh kawngah hian kan strict-in kan fimkhur khawp mai. Zuar an awm àwm keini lam chuan kan hre lo hrim hrim. Zuar an awm chuan warning pek a, an dawr luah zawmtir loh thlengin hrem theih an ni. Zuar ngam an awm kan ring lo," an ti.
Vanglaini-in document a neiha a lan danin, MC-ah hian mi pathum hnen aṭangin grape wine man a ni a, chu'ng mi pathumte chu Rs 3,000 ṭheuh chawitir an nih bakah, receipt pawh pek an ni.
Mi pathumte grape wine an man zat END-in an ziahnaah zu ziah tel a ni lo a, an thil man an ziahte chu - Champwine, Fanai Wine, BCH Wine leh apple juice-te a ni.
Tarlan tawh angin, END minister Dr K Beichhua chuan June 3, 2022 khan Kolasib-a thuthar thehdarhtute'n an kawmnaah, May 27, 2022-a Millennium Centre-a grape wine mantu END enforcement staff-te chu grape wine man tura kal an ni lo niin a sawi.
Dr K Beichhua chuan, ṭawngṭaimi ṭhenkhatin Dawrpui lûn lai takah zu leh ruih theih thil a hluar thu Chief Minister hnenah an thlen niin a sawi a, "Chief Minister hian instruction min lo pe a, grape wine man tuma kal pawh kan ni lo," a ti.
END Minister chuan, grape wine zuartute'n ualau takin grape wine an zuar tih sawiin, "A phênah beer, whiskey leh Korean wine-te tam tak man tur a awm. A vaia man kha kan tih tur dik tak a ni tlat. Champhai wine chauh chu ni se inhriatthiam dan a awm dawn. Danah phal loh ni mah se, heti thleng kan inhrethiam a lawm," a ti a; a inziak lo lamah ngaihhnathiamna nen tun hun an thlen tawh thu a sawi a ni.
Thlalatu : Lalhmingtea Fanai
