Chief minister Lalduhoma chuan ZPM kaihhruaina hnuaiah kum khat chhungin kalphung thar mipui sorkarin ram rorelnaah danglamna tam tak an thlen tawh thu leh, department 15-in Bána Kaih (Handholding) Policy an kalpui mek a, vawiin hian sorkar leh bank-te'n thuthlung an ziah dawn thu a sawi.
CM Lalduhoma hian nimin khan kumin atana ZPM pisa khârna inkhawmah thu sawiin, kum khat chhunga sorkar hmalakna hrang hrang a tarlang a, "Kan ram rorelna kalphung a dik theihna turin kawng tam takin hma kan la a, kum khat chhungin kalphung thar mipui sorkar hian ram rorelnaah danglamna tam tak kan thlen tawh a ni," a ti.
Sorkar kalphung dik kum tam tak an lo aupui tawh tih sawiin Lalduhoma chuan, "Pathian leh mipui zarah sorkarna chu kan chang ta a, engtiang takin nge he kalphung thar mipui sorkar hian ram rorelnaah danglamna a thlen tih hi Zoram mipui hian kan ngaihven a ṭul," a ti a; sorkar kal dan leh hnathawhte chîk turin mipui a chah.
Chief Minister chuan, September 19, 2024-ah Handholding Policy tlangzarh a nih thu sawiin, "Kum 2047-ah Mizoram hi state hmasawn tia sawi kan lo nih theihna tura sorkar hmalakna a ni. Departmet 15-in Handholding Policy an kalpui mek a, mipui pawhin an ngaihven hle, kan thawhpui tur bank-te nen December 17 hian MoU (thuthlung) kan ziak dawn," a ti.
Thlai thar lei chungchang sawiin Duhoma chuan, "Collection centre-ah kan kut hnathawkte'n sorkar rate aia hniama sawhthing man a tlak apiangin an rawn hralh thei dawn a ni," a ti a; hmun tam takah collection centre an siam mek thu a sawi.
Lalduhoma chuan, an hmalakna reng rengin a tum ber chu ram rorelnaa kalphung dik (administrative reform) thlentir a nih thu a sawi rualin, chhungrila dikna (moral reform) mipuiin an neih theih nan hma an lak thu a sawi a, "Aikal lak tihtawp te, sorkar hnathawkte'n hunbi an vawn dikna turte bakah, inrenchemna kawngah theihtawpin hma kan la a ni," a ti.
Chief Minister chuan, kum khat chhungin Legislative Assembly-ah bill 46 an pass tih sawiin, "Dan siamṭhat ngai leh her rem ngai eng emaw zat kan siamṭha tawh bawk. Zu khapna dan The Mizoram Liquor Prohibition Act pawh uluk tak leh fimkhur taka ennawn mek a ni," a ti a; ṭhalaite dan ang thlapa ram danga hna an thawh theihna turin Mizoram Private Placement Agencies Regulation Bill, 2024 duan mek a nih thu a sawi bawk.
ZPM inkhawm hi vice president Lalchhuanthanga, MLA-in a kaihruai a; minister leh MLA bakah, AMC corporator eng emaw zat an tel a ni.
