Spain-in Euro 2020-a an match hmasa berah Sweden an hmachhawn a, Luis Enrique-a hote hian minute 90 chhung inkhel thunun mah se goal an an khung thei lo a, 0-0 in inkhel a tawp.
Group E inkhel dangah Slovakia-in Sweden 2-1 in an hneh ve bawk. La Roja hian June 19, Inrinni zan dar 12:30-ah point la hmu lo Poland an hmachhawn dawn a, inkhel hmuhnawm a ni ang.
Pedri a tel
Luis Enrique-a'n bul ṭantu zingah Pedri a telh a, Barcelona rawlthar hi kum 18 leh ni 201 mi chauh niin Spain tana inlan thei naupang ber a ni.
Spain hian 4-3-3 formation an hmang a, Pedri hi midfield-ah Koke leh Rodri te nen an awm a, tlarhamah Dani Olmo, Ferran Torres leh Alvaro Morata te an awm. Captain Sergio Busquet-a'n Covid-19 a kai avangin a hmunruak hi Rodri-a'n a rawn luah a, Thiago Alcantara leh Europa League-a Villarreal champion puitu Gerard Moreno te chu bench-ah an awm thung.
Tlarhnungah Aymeric Laporte leh Pau Torres te an inkawp a, mual sirah Marcos Llorente leh Jordi Alba te an awm. Inelna takah Valencia wing back Jose Gaya aiin tawnhriat nei ṭha Alba-a'n rin a hlawh a, right back-ah erawh Atletico midfielder Marcos Llorente a awm.
Marcos Llorente hi Enrique-a'n right back-ah a chhawr ngun a, mual sira a awm hi thil mak a ni lo. Chutiang bawkin David de Gea aiah Unai Simon a inlan a, Enrique-a'n Manchester United keeper aiin Athletic Bilbao keeper hi tun hnaiah a ring zawk.
Spain team chu
Spain-in friendly match-ah inkhel thunun chungin Portugal nen goal awm loin an inhnehtawk a, Busquets-a'n Covid-19 a vei avangin Lithuania nen friendly match an neih turah Under 21 team an inlan ta zawk.
La Roja-in ṭum dang angin training an nei thei lo a, group hnihah inṭhenin position khat player an awm dun a thiang lo. Player-ten PCR test an nei chho reng a, hlauhthawnnain an khat. Amaherawhchu Euro match hmasa berah game hmuhnawm an khel a, first half-ah chance ṭhahnem tak an nei. Minute 45 zawh hnuah pawh hlauhthawn tur a la awm lo, goal a lut mai dawn niin a lang.
Second half an ṭan a, goal hmuh tur a awm chuang lo. Portugal nen an inkhelh ṭum ang thoin Spain tlarhmain chance an hlah nasa a, entute mit an tlung pha lo a, auh el an hlawh hial.
Goal khungtu?
Spain-in goal khungtu an mamawh a, Morata-a'n auh el a tawh bakah chance a hlah apiangin fan-te an faifuk. Second half-ah an faifuk ring lehzual a, Morata chhuah hnuah Gerard Moreno a rawn lut. Villarreal forward hi standing ovation an pe hial.
Amaherawhchu Moreno pawh hian goal a khung thei bik lo a, Spain tana chance insiam hnem ber Dani Olmo pawhin goal a khung lo. PSG winger Pablo Sarabia pawhin chance ṭha a hlah a, Spain ṭantuten lungawi lo zetin khelmual an chhuahsan.
Chutihrualin Sweden-in goal an venghim ṭha tih a hriat a, Manchester United defender Victor Lindelof chu man of the match-ah thlan a ni. Janne Andersson hote vannei se chuan chak thei an la ni bawk. Tlarhmaa awm Alexander Isak leh Marcus Berg ten chance ṭha vawi khat ve ve an hlah.
Ngaihnawm
• Spain tana Euro-a khel thei naupang ber Pedri (Kum 18 leh ni 201).
• Euro 2000-ah khan Spain-in match hmasa berah Norway an hneh lo a, hei chiah hi Euro opening match 10 an khelha an chak loh awm chhun a ni.
• Spain hi an match hnuhnung 25-ah vawi khat chiah an chak lo (W15
D9 L1).
• Sweden-in Euro match hnuhnung pathumah goal an khung lo.
• Sweden-in kum 2021-a match ruk an khelhah goal khat chiah an chhuah.
Tute nge inlan?
Spain: Unai Simon; Marcos Llorente, Laporte, Pau Torres, Jordi Alba; Koke (Fabián Ruiz 87), Rodri (Thiago Alcántara 66), Pedri; Ferran Torres (Oyarzabal 74), Morata (Sarabia 66), Olmo (Gerard Moreno 74).
Sweden: Olsen; Lustig (Krafth 75), Lindelöf, Danielson, Augustinsson; S. Larsson, Olsson (Cajuste 84), Ekdal, Forsberg (Bengtsson 84); Berg (Quaison 69), Isak (Claesson 69).
Goal venhim tum team kan hmachhawn a, long ball hmangin vanneihna an zawng. Chutichung chuan chakna chance a nei. Chutihrualin keini tan chuan kan khelh dan thlirin inhnehtawk hi chak lo ang mai kan ni a, player leh fan-te ka tawrhpui takzet. - Luis Enrique, Spain coach
Goal khungna chance kan insiam a, chuvangin han hnualna tur awmin ka hre lo. Spain te anga team ṭha laka point hmu tur chuan khelh ṭhat a ṭul a, kan khel ṭha a ni. Ka player-ten game plan angin an khel chhuak.
- Janne Andersson, Sweden coach
Kan khel ṭha inkhel pawh kan thunun a, goal kan khung thei lo mai a ni. Football-ah chuan goal khung loh ṭum hi a awm a, tlarhmaa player ṭha kan kawl avangin kan hlau thawng lo. Auh el hi chu thil thar a ni lo a, faifuk pawh kan tawn fo a ni. Morata hi player ṭha tak a ni a, amah ti eltute hi goal hmangin a ngawihtir ang. - Aymeric Laporte, Spain defender
