Governor Lt.Gen. Nirbhay Sharma chuan, "Zirlaite an ṭhan chhoh zel nan zirna tluantling nei tura zirtirna pek a pawimawh. Tun hma lama zirna kan lo kalpui tawh dan ang hi thlak danglam a hun tawh hle," a ti.
Nimin khan Institute of Advanced Studies in Education (IASE) conference hall-ah 'National Seminar on 21st Century Challenges in Teacher Education' neih a ni a, Governor hi khuallian niin thu a sawi a ni.
Larsap chuan, tunlai khawvela chona lian ber chu tunlai mila zirtirna pek thiam a nih thu a sawi a, "Mizoram pawh India ramah ziak leh chhiar thiam tam lamah pathumna kan ni a, mahse hei hian eizawnna ṭha leh hauhsakna a keng tel kher lo. Kan ṭhalaite hian graduate leh post graduate degree ringawt ni lo, sumdawnna emaw, kawng dangah eizawnna tlak thiamna an mamawh hlein ka hria," a ti.
Ram leh hnam tana chhawr tlak zirna tluantling kan neih theih nan mi pakhat chauh phûr a tâwk lo tih sawiin governor Sharma chuan, "Zirtirtu ṭha kan mamawh rualin, zirlai naupang mahni tuma chiang leh nu leh pa fate kalna tur ngaihtuahpui thiamte leh fate phûrpui thiam kan mamawh a ni," a ti a; zirtirtute chu a ṭha zawnga khawvel inthlak danglamna kawnga hma hruaitu leh ban pawimawh tak ni turin a chah.
Khualzahawm, H Zothangliana, parliamentary sceretary (H&TE) chuan, IASE chuan a din tirh aṭangin zirna lamah hna an thawk ṭha hlea a hriat thu a sawi a, "Tuna zirlai leh zirlai lo la awm zel turte pawh chhawr tlak a nih zel ka beisei," a ti.
Seminar hi Higher & Technical Education secretary K Lalnghinglova'n a kaihruai a, Ambedkar University vice chancellorProf. SB Menon-a'n thupui a sawi a ni.
IASE hi kum 1975-ah Mizoram Institute of Education tia din a ni a, tunah hian zirtirtu 20 awmin, B.Ed (regular), B.Ed (multi-mode programme) leh M.Ed zir theih a ni.
