State Referral Hospital (ZMC)-a Covid-19 vei na zualte enkawlna ICU bikah thla khatah oxygen atan cheng nuai 20 chuang an hmang ṭhin a, ni khatah Rs. 80,000 velte an séng ṭhin. ICU-a doctor-te chuan, oxygen leh ventilator chu hautak mah se, a lungngaih thlak rih loh thu an sawi a, ICU-ah nurse tawnhriat nei tawh chin an mamawh thu an sawi bawk.
Vanglaini palaiin a kawmnaah ICU enkawltu Dr Micky Zodinpuia, anaesthesiologist chuan, ICU-a damlote enkawl turin ni khatah vawi thum/li luh a ngaih thu sawiin, "Ni khatah mi pakhatin oxygen búr ngate an hîp ṭhin," a ti.
Ni khatah oxygen litre nuai 14 velte an hmang ṭhin tih sawiin Dr Micky Zodinpuia chuan, "Tun hnaia oxygen generator thar kan neih hnuah min pui hle. A hma chuan oxygen bûr 200 chuangte kan hman laiin, kháwl thar kan neih hnuah ni khatah oxygen bûr 120-130 vel kan hmang," a ti a; oxygen bûr lianah litre 6,000 vel a len thu a sawi.
ICU enkawltu Dr Johan Vanlalpeka, medicine leh Dr Micky Zodinpuia-te chuan, damlote tan oxygen a hautak hle thu sawiin, "Ni khatah litre nuai 14 vel kan hmang a, Oxygen Generating Plant nei ho F Kapsanga, LZ leh Zoram-te hian ni khatah litre nuai 70 chuang an siam chhuak thei a, Central aṭangin tuna neih aia tam, litre 300 awm thei an rawn pek dawn avangin oxygen bikah chuan a lungngaihthlak loh ang," an ti. Kumin May thla khan F Kapsanga-te chhungkua aṭangin oxygen cheng nuai 15 man a thlâwna an dawn thu an sawi bawk.
Ventilator chungchangah ICU-a doctor-te chuan, "Covid bikah chuan a aia ṭha a awm bik chuang lo ang, a ṭha ber chi ang kan nei nual a, hman loh pawh kan la nei nual a ni," an ti a, harsatna a awm lo turah an ngaih thu an sawi.
Dr Johan Vanlalpeka chuan, Covid-19 avanga damdawi ngaihven em em Remdesevir injection chu an dawn ṭhat thu te, pharmacy canteen-in damdawi an pek hneh thu leh a thlaphàn thlak loh thute a sawi a ni.
ICU-ah damlo enkawl a hautak avangin tawnhriat nei ṭha nurse an mamawh belh hle thu an sawi a; tunah hian SRH-ZMC ICU-ah anaesthesiologist paruk, medicine doctor paruk, respiratory medicine pahnih an awm thu an sawi bawk.
