Chief minister Lalduhoma chuan January 4, Ningani tlai khan Union Home minister Amit Shah chu a pisaah a hmu a, thil pawimawh hrang hrang an sawi dun. Amit Shah chuan, Myanmar ram a ralmuan hma chuan Myanmar ráltlânte an ramah thawn haw an tum lo tih a lo hrilh.

Union Home Minister chuan, India rama ram dang mi (foreigner) awm zawng zawngte kutzia (finger print) lâka chhinchhiah chu India sorkar policy a nih thu a sawi a; Myanmar raltlan Mizorama awm mekte chungchangah, "Myanmar ram a ralmuan hma loh chuan raltlante hi thawn kîr an ni dawn lo tih Mizoram mipuite'n min lo hriatsak se ka duh," a ti.

Amit Shah-a'n Myanmar raltlante an ram a ralmuan hma loh chuan thawn kir an tum lo tih a sawi hnuah CM Lalduhoma chuan hmalak zui zel dan tur Union Home secretary Ajay Kumar Bhalla a sawipui leh nghal a ni.

CM Lalduhoma leh Amit Shah inkawmnaah hian kum 2019-a Mizoram sorkarin Household Registration Bill a pawm tawh, President-in tun thlenga a la pawm loh chungchang an sawi dun a; Bill-a siamṭhat ngai awmte an siamṭhat hnuah a thara thehlut leh turin Amit Shah chuan Lalduhoma a hrilh tih sorkar thuchhuahin a tarlang.