Disaster Management & Rehabilitation (DMR) department chuan vawk pûl hri leng mek, African Swine Fever (ASF) chu state disaster atan a puang a, State Disaster Management Authority (SDMA) hriatpuinain kum 2024-a khuarel chhiatna zingah ziah luh a ni.
SDMA State Executive Committee chuan ASF vanga Mizorama harsatna hrang hrang thleng leh sum hlohte chu Disaster Management Act, 2005 hnuaiah State Disaster Response Fund (SDRF) aṭangin zangnadawmna a pe thei dawn a; a kalphung turah state sorkar leh central sorkara Disaster Response Fund kalpui dan angin hmalak a ni ang.
ASF avang hian kuminah Mizoram hmun hrang hranga khua leh veng 246-ah vawk 13,889 a thi tawh a, vawk 23,272 suat a ni tawh. Kum 2021-a Mizorama ASF a lên tirh aṭanga nimin thleng khan vawk thi leh suat zat chu 1,09,498 a tling.
ASF vanga vawk thi, zangnadawmna dil an awm a nih chuan ASF vanga thi a ni ngei tih district veterinary officer (DVO)-te'n an finfiah tur a ni a, SDRF guideline angin vawk pakhatah zangnadawmna Rs 4,000 zel pek theih a ni.
Hetih lai hian, vawk suatte chu SDRF hnuaia zangnadawmna zingah a tel thei lo a, vawk suatte tan chuan centrally sponsored scheme hnuaia Assistance to States for Control of Animal Disease (ASCAD)-ah zangnadawmna beisei theih a ni.
ASF vanga vawk thite state disaster atana puanna notification chu October 14, 2024 (Thawhṭanni) khan chhuah a ni a; zangnadawmna dawn tumte tan chuan vawk an thih aṭanga ni 30 chhung emaw, notification chhuah aṭanga ni 30 chhungin zangnadawmna dilna tifel a ngai.
Zangnadawmna dilna chu DVO kaltlangin mahni district ṭheuha deputy commissioner (DC)-ah a lut khawm ang a, DMR department-ah thawn a nih hmain uluk taka endik leh phawt a ni ang. Zangnadawmna dawng tura tihte chu an bank account-ah pawisa thun tur a ni.
ASF vanga vawk thi, sorkar hnuai aṭanga ṭanpuina dawng tawh hrim hrimte chu tun ṭuma zangnadawmna pek tur hian a huam dawn lo thung.
