Zote Honda MPL9 Khawzawla khelhah FC Venghnuai leh Chawnpui FC ten hnehna an chang.
Nimin inkhel hmuhnawm takah Venghnuai hian Electric Veng FC 3-0 in an hneh a, Chawnpui hian Chanmari FC 2-1 in an hneh ve bawk.
Rindika Hmar hoten an result ṭhat an chhunzawm avangin point 11 an hmu a, pahnihnaah an inhlang chho a. Chawnpui pawhin team lian Chanmari an hneh avangin round 5 zawha table mawngphaha awm kha panganaah an invawrh chho bawk.
Goal thum
FC Venghnuaiin Electric Veng lakah inkhel an thunun a, minute 18-naah Lalnunzira Hnamte cross chu C. Ramnunpuia'n (Tea Chinzah) tauh lutin hma an hruai. Second half-ah inkhel a danglam lo a, Venghnuai bawk an chungnung.
Bench aṭanga lut Lalruatfela (RF-a) chuan captain VL Thanga siamsak chu box pawn aṭangin mawi zetin a pet goal a, Venghnuaiin nuamsa zawkin an khelh theih phah. Chutihrualin Electric Veng forward Lalremsanga'n crossbar a tauh ber a, goal zawk se chuan inkhel tawp lam boruak a ṭang lehzual ang.
Injury time-ah Venghnuai wing back Zira'n dinglam aṭanga ball lalutin keeper C. Vanlalhriata'n angle a khar lo tih a hmu a, chiang zetin a pet goal. Rindika Hmar hote hian Aizawl FC an hmachhawn leh dawn a, hnehna an chang a ni chuan phase 1-ah pakhatna dinhmun an luah thei dawn.
Chawnpui a par
Chawnpui FC-in beiseina sang tak nen coach Lalsangzuala Hmar lalut mah se result ṭha an nei thei meuh lo a, amaherawhchu Khawzawlah coach Sanga hian a club hlui Chanmari FC hnehin point thum hlu tak an hlawh chhuak.
Chawnpui leh Chanmari-te hi chak tuma an inkhelh avangin goal chance pawh a ṭhahnem a, inkhel a hmuhnawm.
Player tawnhriat nei ṭha MC Malsawmzuala'n minute 48-naah Chawnpui hmahruaina goal a khung a, Chanmari lamin F. Lalnuntluanga hmangin minute 61-naah an sut.
Chanmari an khel ṭha chhunzawm a, goal chance pawh nei mah se Chawnpui keeper Moses Lalbiakngura an paltlang thei lo. Chawnpui erawhin hun ṭha an bawhpelh lo a, an freekick hmuh hmasak zawk crossbar pet per nan hmang mah se minute 82-naa an freekick hmuh chu MC-a'n goal kilah mawi zetin a pet lut.
Khawzawlah Chawnpui an par ta a, Aizawlah an vul chhunzawm ang em, tih chu hunin a hril ang.
