Pep Guardiola chuan Bayern Munich nena sawizawm Kyle Walker chelh tura theihtawp an chhuah tur thu a sawi. June thla khan Walker leh Bayern Munich te hi an in dawr a, a thuphungin inremna nei tawha sawi an ni.

Amaherawhchu inremna hi ziakin a la awm lo a, club pahnih hi Walker-a man turah an la inrem lo. Bayern head coach Thomas Tuchel-a'n Walker-a chungchang zawhna a chhang duh lo a, Guardiola pawhin club pahnih indawr dan sawi duh lo mah se Walker chu thlak theih loh a nih thu a sawi thung.

Spanish manager Pep Guardiola chuan, "Thomas Tuchel leh Kyle Walker te kawmna ka lo hre tawh a, an thusawi ang tho khan sawi zui ka tum lo. Ka sawi duh erawh, Walker hi kan tan chuan player pawimawh bik a ni.

"A theihna ang hi a danglam a, khawvel pum ang pawhin a thlakna hmuh a harsa ang. A danglam bik avangin thlak theih loah ka ngai. Kan duh a, chutihrualin thil thleng tur erawh ka hre lo. Club pahnih an indawr tih ka hria a, chelh tumin theihtawp kan chhuah dawn," tiin a sawi.

Season liam ta khan Man City-in nomawi lian pathum Champions League, Premier League leh FA Cup an chawi a; Walker hian hmun pawimawh a chang pha lo.

Pep-a'n defender John Stones chu match pawimawh tam zawkah midfield-ah a chhawr chungin Walker hian khelhna hun a ngah tawk lo. FA Cup final-ah Walker hian bul ṭan mah se Champions League final-ah bench aṭangin a lut.

Season liam ta khan Pep-a'n Walker aiin Manuel Akanji, Ruben Dias leh Nathan Ake te a dah pawimawh zawk. Chutihrualin Pep-a'n mamawh hun a nei, UCL semifinal-a inhliam vanga Ake a khelh theih loh khan Walker-a'n bul a ṭan. City hian Europe-a record nei ṭha ber Real Madrid chu aggregate-ah 5-1 in an sawm a, Walker hian Los Blancos chhuanvawr Vinicius Jr a dah ṭha.

Walker hi thlak theitu tur an awm a nih chuan Bayern right back Benjamin Pavard chu a thlakna tura ṭha ber a ni thei ang. Khawthlang media te chuan City leh Bayern te hian Walker leh Pavard te hi an inthleng dawn nia sawi pawh an awm a, hemi chungchang hi Guardiola-a'n a sawi chhunzawm duh lo.

England international Walker bakah hian Ruben Dias chungchang sawi a awm bawk. Pep chuan, "Player hming lamrik pahnih te hi kan tan an pawimawh ve ve. An cham a nih ngat chuan team tan pawimawh chhunzawm ang. Chutirhualin an thutlukna erawh kan zahsak a ṭul ang," tiin a sawi.

Manchester City hian vawiin tlai dar 4:00 hian Tokyo-ah Bayern Munich nen friendly match an khel dawn.