Thawhṭanni zan UEFA Nations League inkhel hmuhnawmah France chuan 2-1 in Belgium an hneh a, Les Bleus tan quarterfinal khel turin dinhmun a ṭha zel - hetihlai hian Belgium tan erawh relegation a hnai leh ta sawt.
France tan Randal Kolo Muani chuan goal hnih khungin, mualneitu Belgium tan Lois Openda chuan goal khat a khung ve bawk - mahse, mualneitu Belgium-in a chhanletna tur an nei loh avangin 2-1 in France an chak.
Group 2 inkhel dangah Italy chuan 4-1 ngawtin Israel an sawp a, match li an khelh aṭanga point 10 nei tawhin, Azzuri hi table chung ber luahtu an ni mek.
King Baudouin Stadium-a inkhelah boruak a 'hot' a, inkhel hmuhnawma thleng tur ang chu a thleng kim, tiin a sawi theih. Penalty pet goal lo, goal pawm loh leh red card thlengin hmuh tur a awm vek!
Penalty ve ve
Mualneitu Belgium lamin goal khungna chance an nei hmasa zawk a, mahse, an chance neih an chhawr lo. Inkhel ṭantir lamah France centre back William Saliba chuan Lois Openda a titlu a, tirah penalty pek ni lo mah se, Video Assistant Referee (VAR) rawn a nih hnuah pek an ni.
Belgium tan Youri Tielemans a lo pen chhuak a, mahse, Aston Villa midfielder hian an hun ṭha neih chu boruak sang lamah a thlawh chho - chak mamawh Belgium-in an mualah hmahruaina hun ṭha an khawhral a, an tuar zui.
Belgian defender Wout Faes chuan penalty box chhungah a kutin ball a tawk fuh a, referee-in penalty spot a kawk. A pet turin Kolo Muani a lo pen chuuak a, Paris Saint-Germain forward hian a hlah ve lo. Minute 35-naah hmahruaina goal a khung.
Mahse, Belgium an hnufual rei lo. Timothy Castagne-a ball cross chu Openda chuan first half hun pek belh minute thumnaah a khung a, RB Leipzig forward hi Tielemans-a penalty hlah tak hlawh chhuaktu a ni bawk.
A tawpah France
France hian Manu Kone hmangin hma an hruai nawnah an inngai hman a, mahse, goal luh hmaa Kolo Muani handball vangin goal-ah pawm a ni lo - Les Bleus goal hmasa khungtu Muani erawh a indawmkun mai duh lo.
PSG forward hi minute 62-naah a inlan leh a, Lucas Digne-a cross ṭha tak chu France hmahruaina goal ni turin a khung - hun tawp thlengin goal dang a lut tawh lo a, 2-1 in France an chak.
France hian an player langsar leh captain Kylian Mbappé chu tun international break-ah hian squad-ah telh loin chawlh hahdamna hun an pe a, mahse, Real Madrid striker tel loin hnehna an chang.
Hetihlai hian Mbappe awm loh hlana captain armband hrengtu Aurelien Tchouameni a che fuh lo a, Real Madrid midfielder hian box pawn chiahah Tielemans titluin a yellow card pahnihna a hmu a, hnawhchhuah a ni - Les Bleus hian hun tawp lam minute 14 chu player 10-a an khelh a ṭul a, Belgium-in an chhawr lo.
Belgium an chuai?
'Golden Generation' ti meuha an hminglem an pek Eden Hazard, Vincent Kompany, Jan Vertonghen, Dries Mertens leh Toby Alderweireld te ho hun a liam a, tun international break-ah Kevin de Bruyne leh Romelu Lukaku te chawlh pek an ni bawk.
Hetihlai hian Real Madrid keeper Thibaut Courtois chuan tuna an coach Domenico Tedesco chu an coach a nih chhung chuan ram tan inlan leh a tum tawh loh thu a sawi a, Belgium-in chuai lam an pan ta mai em ni? tia inzawh theih tak a ni.
Nations League match li khelh tawha vawi khat chiah la chak hi Belgium tan result ṭhaa chhiar chi a ni mawlh lo a, vawi hnih tlawmin, vawi khat an khingpui an inhnehtawkpui bawk - November-ah Italy an la hmachhawn dawn zui!
Hetiang boruak karah hian Belgium-in lawmna tur erawh an nei tho a, player chhuak thar an nei ve zel. France laka goal khungtu Openda kha kum 24 mi chauh a la ni a, season hmasa khan RB Leipzig tan inelna hrang hrangah match 44 khelin goal 28 a khung a, tun season-ah match kua khelin, goal nga a khung leh der tawh bawk.
