AMC Board of Councillors nimina mayor Lalrinenga Sailo kaihhruaia ṭhukhawm chuan kum 2023-2024 chhunga an budget atan cheng vbc. 114.79 an pawm a, kum 2022-23 budget estimate vbc. 65.69 aiin vbc. 49.1 in a tam zawk.
Nimina AMC Board of Councillors meeting-ah hian June 2, 2023-a an ṭhutkawm ṭuma executive corporators (cash & accounts) Lalringliana'n budget a pharh tâk chu corporator-ten an sawiho hnuah pawm a ni.
15th Finance Commission hnuaiah kum 2023-2024 ULB Grants bik atana AMC chan tur chu cheng vbc. 30.65 niin, kum hmasa (2022-23) budget-a lo dah tawh, la dawn loh cheng vbc. 35 chu dah nawn leh a ni.
Sum hmanna tur ruahman ṭhenkhat chu - bawlhhlawh sawngbawlna tur, AMC assets siamna tur, ward tihchangtlunna tur, street light enkawlna, local council inrelbawlna tur leh Aizawl mipuiin tui in tur thianghlim hnianghnar taka an neih theih nan rain water harvesting programme kalpuina turte a ni.
Meeting-ah hian AMC chuan kum hmasa 2022-2023 chhungin state sorkar aṭanga sum a dawn tur kim takin a dawng tih tarlan a ni a, sorkar chungah lawmthu an sawi.
AMC budget estimate 2023-2024 hi Mizoram Municipalities Act, 2007 (as amended from time to time)-in a phût ang chuan March 10 ral hmaa pharh tura tih a ni a, Lunglei Municipal Council (LMC) inthlan avang leh chumiin a nghawng Urban Local Body Grant ṭhen dan turte siam fel a ngaih avangin budget hi pharh tlai a ni.
SUM HMUHNA TURA BEISEI
1. 15th Finance Commission hnuai aṭangin cheng vbc. 65.64.
2. Mizoram sorkar aṭangin cheng vbc. 21.42.
3. AMC sum thawhchhuah tur leh kum hmasa lama sum hman bàn cheng vbc. 27.73.
