GIG Motors Inter Village Football 2024-ah Kolasib Town Joint VC an kal fawr a, an khingpui apiang an sawp. Kolasib hian Sakawrtuichhun, Mission Veng leh Republic Veng te an sawp hnuin nimin khan Bethlehem Vengthlang chu 3-0 in an hneh.

RG Stadium-a inkhelah Kolasib tan Paul Ramfangzauva'n goal hnih a khung a, PC Pazawna'n goal khat a khung ve bawk. Semifinal thleng turin Kolasib-in match liah goal 34 an khung a, goal an la chhuah lo.

Danglamna thlentu Paul

Bethlehem Vengthlangin ṭum dang angin squad an nei chhah lo a, chutihrualin coach Lalsangzuala Hmarin a enkawl miau avangin quarterfinal hial an thleng. Sanga hian BVT player a hriat chian avangin Kolasib lakah pawh a fimkhur a, tlarhnung a rem phui ṭha hle.

Kolasib-in inkhel an thunun a, chutihrualin goal chance insiam mai erawh an harsat. Minute 20-naah defender F. Lalruatfela'n mual laiah ball a chang a, a hmaa awm PC Pazawna a pe. AFC Academy player Pazawna hian a vir pui hnuah Paul-a a pe a, ISL player hi ball khawih miah loin a insiamrem a, goal-ah kawh pawtin a pet goal.

BVT goalkeeper Lallawmzuala tan dan theih a ni lo a, tlarhnunga defender palite pawh inrem ṭha viau mah se tih theih an nei lo. Dem theih tur bera ngaih midfielder-te pawh sawisel an harsa, a chhan chu Paul-a'n ball pet turin hun a mamawh tam tlat lo.

Chance ṭha hlah

Kolasib-in inrintawkna an neih belh a, BVT an talbuai chhunzawm thung. Minute hnih hnu vel lekah PC Pazawna'n penalty a hlawh chhuak leh a, Paul-a'n a pet over luah.

BVT lam tan beiseina thar a awm phahah ngaih theih mah se ball chan an harsat. Goal hmaah Kolasib an hlauhawm chhunzawm a, Mizoram Police winger Isaak Malsawmkima pawh a nung viau.

Kolasib keeper H. Lalrinzuala'n hna a nei meuh lo a, a neih chhun erawh hna harsa bik a ni. BVT striker Malsawmzela'n (Valpuia) ṭha taka a lakluh hnuah goalkeeper chauh a hmachhawn a, goal-ah pet bawk mah se Rinzuala'n a dang. First half-ah 1-0 a ni.

A goal belh

Second half-ah pawh inkhel a danglam tam lo a, Kolasib bawk an chungnung. Minute 52-naah Kolasib-in mawi zetin BVT tlarhnung an ṭhiat a, penalty hlawh chhuaktu PC Pazawna'n goal kilah tak a pet lut.

Inkhela chungnung zawk Kolasib-in goal hniha hma an hruai miau avangin darkar khat pawh tling loah chak tur a chiang ṭan der tawh. BVT aiin Kolasib zawkin goal chance an ngah zawk a, keeper Zolawma chet ṭhat zarah goal dang a luh belh lawk lo.

Kolasib-in khung belh tumin nawr chiam tawh lo mah se an tlarhmate an hriam miau avangin an vuak let erawh a na hle. Minute 82-naah Paul-a'n chance ṭha a nei a, box chhung chiah aṭangin kawh zetin a pet goal.

Inkhel thununtu Kolasib 3-0 in an chak a, an vanneih ṭum ni se goal tam zawk khung thei an ni. Paul-a'n penalty a hlah bakah bench aṭanga lut RM Zothansanga'n goalkeeper a bum vek hnuah goal ruakah a khung lo.