Mizoram sorkar chuan Mizoram State Health Care Scheme (MSHCS) hnuaia damlote bill táng mek pek a nih thei nan cheng nuai 2,000 pek a nih dawn thu a puang.
Sorkar thuchhuah tarlan danin, MSHCS-a inziak lut damlote'n an inenkawlna senso phuhrûkna turin nimin khan Planning & Programme Implementation department-in Socio Economic Development Programme sum, untied fund aṭangin cheng vaibelchhe 20 a ruahman a ni.
Vanglaini zawhna chhangin Planning dept. hotute chuan, SEDP aṭanga cheng nuai 2,000 pek chhuah leh tur hi a taka pek chhuah hun tur sawi theih a la ni lo tih an sawi. Cheng nuai 2,000 hian bill lut tawh eng chin nge a daih dawn tih hriat theih a ni rih lo.
RTI Act hmanga zawhna Health & Family Welfare department-in August 2022 laihâwla an chhàn danin, health care bill bá cheng vbc. 74.04 a awm a, zawhna chhan hnuah bill eng emaw zat a luh belh leh tawh.
Thu dawn danin, Mizoram sorkarin a hmaa MSHCS-a inziak lut damlote bill bá rulhna tur hi tun thla tir khan pe chhuakin, a pek chhuah zat chu cheng nuai 400 a ni. Cheng nuai 400 hian June 2021 leh a hma lama bill lut tawhte pek theih beisei a ni a, June 2021-a bill lutte erawh a daih kim dawn loa ngaih a ni.
MSHCS-ah hian kum hmasa lam ngaihtuahin inziak lut zat an tlahniam hle. October 1, 2019 leh September 30, 2020 chhung atana inziak lut chhungkua 1,13,720 an awm laiin, October 1, 2021 leh March 3, 2022 atana inziak lut chu chhungkua 87,695 an ni a, kum kal mek April 1, 2022 leh March 31, 2023 chhung atana inziak lut zat phei chu chhungkua 39,505 chiah an ni tawh a ni.
