Food, Civil Supplies & Consumer Affairs (FCSCA) department chuan ration card várte tana buhfai man an tihdanglam tur chu ennawn a ni mai thei a; ration card enṭhat a ni dawn bawk.
Vanglaini palai zawhna chhangin FCSCA minister B Lalchhanzova chuan, ration card var tana buhfai man thar an bituk chu October 2024-a hmang ṭan turin an inbuatsaih thu a sawi a, "Food Corporation of India (FCI)-in August 2024 hian buhfai man an ennawn dawn a, chumi azir chuan ration card var tana buhfai man bituk tawh pawh tihdanglam a ni mai thei. A hma aia tláwma FCI-in an bituk chuan kan bituk sa ai pawhin a tláwm leh mai thei," a ti.
FCSCA Minister chuan, ration card ennawn a ni dawn tih sawiin, "Veng tinah Non-Food Security Act (NFSA) Committee kan tuaithar leh dawn a, anni hian ration card var ni mek zinga ration card pawl (blue) leh eng (yellow) tur zawkte an zawng chhuak ang. Chu'ng mite chu ration card var kan pe ang. Mipuite'n an ration card tur dik tak an neih theih nan theihtawp kan chhuah dawn," a ti a, ration card-ah politics inrawlh an remtih loh thu a sawi.
Supply Minister dawi danin, FCSCA department-in VIP leh sorkar hnathawk group A officer-te'n ration buhfai an lak ṭhin a tihtawp dawn avangin department hrang hrangah group A officer list dil mek a ni. Group A officer eng emaw zat chuan an ration card sorkarah an pe lêt (surrender) tawh. VIP leh group A officer-te chu document pawimawha hman turin ration card siamsak an ni dawn tho a, buhfai lakna atan erawh hman theih a ni dawn lo.
Tarlan tawh angin, FCSCA department chuan ration card var hmangte tan ration buhfai kg. khat Rs 15-a lâk ṭhin chu Rs 30-ah a tisang dawn a, chu chu October 2024-ah kalpui ṭan tum a ni.
Ration card var tana buhfai man tihpun avang hian buhfai leina atana sorkarin thla tina sum a sen aṭangin cheng nuai 525 vel a hum theih beisei a ni.
