Department of Personnel & Administrative Reforms (DPAR) minister K Sapdanga chuan, sorkar hnathawk aikal lak tihtawp tuma an hmalaknaah sorkar chu hnungtawlh a tum loh thu a sawi.
K Sapdanga hian August 31, Inrinni tlai khan a chenna inah thuthar thehdarhtute a kâwm a; aikal lakin Mizoram pumah nghawng a neih nat thu sawiin, "ZPM kan sorkar hlimah department tinah aikal zat kan zawt chhuak a, an lak chhante nen. Aikal la mi 3,365 lai an lo awm. Sorkar hnathawk lo ṭhahnem takin sorkar thuruk leh file an khawih ṭhin tih a lang," a ti.
Aikal lak chu dan phal loh a ni tih sawiin K Sapdanga chuan, "Hun bithliah neiin hmalak chhoh a ni. Sorkar officer-te pawhin an zâwm ṭha a, aikal la zawng zawngte'n aikal lâk titawpin an hna an zawm kim tawh tih hi tuna kan report neih chu a ni," a ti a; report an dawn chinah aikal la an awm tawh loh thu a sawi.
DPAR Minister chuan, report dik lo a awm chuan controlling officer-te lakah department proceeding lak tur a nih thu sawiin, "Tunah hian thuthang mak tak tak a awm. Entirna pakhat chu, zirtirtu pakhat chuan sikul ṭan dawnah a hming a ziak a, a fate class a laktir ṭhin. Bân dawnah hming a va ziak leh ṭhin. A ṭhatna chin a awm thei, mahse, mi dangin thîkin ti ve zel se a ṭha dawn lo," a ti.
Sorkar hnathawkte chuan sorkar hna thawk tura lak an nih chhan anga hna an thawh a ṭhat mai thu sawiin Sapdanga chuan, "Aikal ang chi hrim hrim a rem lo. Report kan dawn chu kan bawhzui zel. Kut man mualpho a awm rih lo. A awm palh ang tih kan hlau," a ti a; aikal la ru an la awm palh a nih chuan man chhuah an nih hma ngeia aikal lak titawp turin a chah.
DPAR Minister chuan, aikal lak tihtawp chuan mipuiah nghawng a nei dawn tih an hriat thu a sawi a, "Aikal lak ṭhatpui zawk department pawh awm theih a ni. Tui sem, electric line chhe siam, sikul, etc.-ah a ṭan tirh chuan harsatna a awm ngei ang. Mahse, chumi paltlang ngam loa a dik loa kal reng ṭha kan ti lo. Chuvangin, aikal lak tihtawp tumnaah sorkar hnungtawlh loh a tum," a ti.
K Sapdanga chuan, aikal lak tihtawp chu tun atan leh nakin zel atan a la ṭha dawna an hriat thu sawiin, "Harsatna a awm deuh a nih pawhin paltlang ngei kan tum. Aikal lak hrim hrim hi eng vang pawh ni se, chinfel kan tum a, khauh taka kal kan tum," a ti a; aikal lak tihtawp an tumnaah an hlawhtlin ngei an beisei thu a sawi.
Minister ṭawiawmtu DPAR secretary K Lalthawmmawia chuan, eng emaw avanga an hna zawm theih lote tan sorkarin ruahmanna a siam thu a sawi a, "An chawlh neih zawng zawng an la zo thei a, chumi hnuah pawh pension-a an chhuah theih dan siam a ni. Pension-a chhuah theih dan chi hrang hrang a awm a, thawk zawm thei lote tan sorkarin kawng a hawng a ni," a ti.
