Covid-19 vangin Cristiano Ronaldo-a'n Juventus jersey hain Barcelona a hmachhawn thei lo a, Lionel Messi hoa feh chhuak Catalan club-in khualmualah 2-0 in Italian club hi an hneh. 

Bara tan Ousmane Dembele leh Lionel Messi (penalty)-ten goal khat ve ve an khung. Álvaro Morata chuan Juve tan goal thum a khung a, mahse offside vek a ni! Minute 85-naah Juve defender Merih Demiral hnawhchhuah a ni bawk.

 

Ronaldo-a'n inkhel turin a hma darkar 24-ah a 'negative' tih a hriat a ngai a, a result hriat erawh a la 'positive' thu a ni. Taksa hrisel leh inenkawl ṭha Ronaldo-a'n a test result a ring zo lo a, "PCR (polymerase chain reaction) hi awmze nei lo a ni," tiin social media lamah Covid-19 test-na a sawisel hial.

Portuguese forward tel loin Juventus an inlan zui a, Ronaldo-a'n a hriat duh loh result bawk a hre zui - Champions League nomawi chawi tuma a pan Juve-in Barcelona an ngam lo. 

Barcelona hi El Clasico-a tlawm hlim an ni a, Real Madrid laka an tlawm hma hian team naran Getafe chu 1-0 in an ngam lo bawk. 

Hei mai a ni lo, El Clasico-a an tlawm hnuah club president Josep Maria Bartomeu-a'n a hna aṭanga banna a thehlut a, a tawi zawnga sawi chuan Barca hi an buai takzet. 

Buaina hnung puak chungin Barca-in Turin khawpui an pan a, Ronaldo tel thei dawn lo mah se Juve laka chak tura dah ngam pawh thil harsa tak a tling. 

Mahse, Barca hian minute 14-na lekah goal hmahruai an khung a, Ronald Koeman hnuaia insiamṭha mek Ousmane Dembele pet chu fedender-in an dan pial hnuah Juve keeper Wojciech Szczesny tan dan hman a ni tawh lo. 

Tun season La Liga match nga an khelh tawhah Barca hian vawi hnih chiah hnehna an la chang thei a, an thiampuipa Messi lahin penalty aṭanga a pet luh tih loh chu chhuan tur a nei lo. 

Mahse, Nilaini zan Champions League-ah erawh Barca thawnthu a danglam a, an inkhel a hmuhnawmin Barca passing game dik tak kha kan hmu leh ṭan ta niin a lang. 

Lionel Messi chu inkhel khaikhawmtu a ni a, Barca forward hi kum 33-ah pawh Catalan club tan mawina a la ni reng - Dembele goal khung chu a siamsak a ni. 

Hun pek belhah Messi hian penalty hmangin goal a khung bawk a, penalty hi rawlthar ṭhangduang Ansu Fati hlawhchhuah a ni.

Barca boss Koeman chuan, "Kan khelh danah ka lawm a, kan result pawhin min tilawm em em - chu zawng ai chuan ka player-te rilru put hmang khan min tilawm lehzual a ni. 

"Goal khung theihna chance vawi tam kan insiam a, ka ngaihdan dik takah chuan hma taka intihsiakna tawptir thei hial dinhmunah kan ding a ni," a ti a, goal tam zawk khung an phu thu a sawi. 

Barca hian league lamah an beisei ang result nei thei rih lo mah se Champions League-ah erawh match hnih khelin vawi hnih an chak tawh a, an match hmasa berah Ferencvárosi chu 5-1 in an sawp. 

Group G inkhel dangah Ferencvárosi hian 2-2 in Dynamo Kiev chu an inhnehtawkpui a, Kiev hian  Viktor Tsigankov (penalty) leh Carlos De Pena hmangin 2-0 in hma hruai hman mah se Ferencvaros tan Tokmac Nguen leh Franck Boli-ten si phurh an sut - Kiev lamah hian Serhiy Sydorchuk chu minute 86-naah hnawhchhuah a ni. 

Juventus an chak lo a, Álvaro Morata chuan goal thum a khung - a goal khung pathum erawh offside vangin pawmsak loh vek a ni a, Spanish striker vanneih zan a ni lo. 

Season hmasa Champions League aṭang tawhin Morata aia European club football inelna sang bera offside ngun an la awm lo a, vawi 13 ngawt a offside tawh. 

Juve hian Ronaldo tel loh an tuar tih loh rual a ni lo a, minute 90 chhungin offside-a Morata thun loh chu target-a shot an nei lo - September 27 hnua Covid-19 vanga inkhung hrang Ronaldo tel loin match li an khel tawh a, vawi khat chiah an la chak. 

Maurizio Sarri duh khawp loa Andrea Pirlo laluttu Juventus thuneitute an lu a hai ṭanin a rinawm a, player a nih laia midfielder thiam bik hian khelmuala a theihna ang kha khelmual sir aṭangin a la lantir thei rih lo.