Premier League champion an nih tumna kawngah Arsenal hian chhuanlam emaw, an hlawhtlin loh chan dang emaw zawng ta se la, season hmasa Aston Villa laka an sulhnu ṭha lo kha a langsar pawl tak a ni ngei ang.

Zanin dar 10:00 hian Villa Park-ah Gunners hian Aston Villa an lenchilh dawn, kawng awlsam a ni dawn lo. Unai Emery naute hian chak tumin mikhual an lo dawngsawng ngam ngei ang tih a rin theih.

Season hmasa

Arsene Wenger a chhuah khan, manager hrang hrang hming ri zingah Unai Emery lak a ni a, hun erawh an pe rei lem lo. Emery hi Mikel Arteta-a'n a rawn thlak ve leh thung a, ani erawh hun bakah player leina tur pawisa pek a ni bawk.

Arteta hian team a dinnghet viau tawhah a inngai a, mahse season hmasa khan Emery enkawl Villa hi vawi hnih an hmachhawn a, an tlawm ve ve. Emirates Stadium-ah 2-0 ngawta an tlawmna chu EPL nomawi an hloh chhan langsar a ni.

April thlatir lamah Villa hi an hmachhawn a, mikhual team hian Leon Bailey leh Ollie Watkins te goal hmangin an luhchhuah a, a hnuah Gunners hi a zawnin vawi ruk chak mah se Manchester City chu point hnihin an phak lo.

Gunners hi an duh loha an hnawl hnu Emery-a'n an champion tumna kawng a dansak anga sawi theih a ni a, khelna hmun an pek tam theih loh vanga chhuak goalkeeper Emi Martinez chu North London kaltluang lai dangtu a ni bawk.

Danglam tum

Season hmasa khan Arsenal hian vawi hnih ngam loh chu team pakhat chiah an nei, an hming chu Aston Villa an ni. Arteta chuan, "Kan intawn vawi hnihah khan goal an khung ve ve a, keini chuan kan khung lo, kan danglamna chu goal a ni.

"Goal khung theihna remchang tam tak insiam chunga kan khung lo kha ka tuar, tun ṭumah chuan season hmasa aia ṭha zawkin kan khelh ngei a ngai dawn. Hmun awl kan pe zeuh a nih chuan min hrem leh dawn tih pawh a chiang.

"Chuvangin fimkhur takin kan khelh a ngai ang, coach ṭha takin player ṭha tak tak a enkawl awmkhawm an ni," tiin an khingpui tur Villa a dahsang hle a, a fak viau rual hian hneh a châkna a sang hle ang tih chu thil chiang sa a ni bawk.

Spanish manager Arteta hian a player neih laite a ringtawk tih a sawi bawk a, tun dinhmunah player ṭha a neih zingah hliam leh harsatna nei an awm lo, an ṭhat dan takin Villa an lenchilh thei dawn, chhuanlam siam a remchang dawn lo a ni.

Champion inring Martinez

Unai Emery hi champion thiam manager a ni a, tun hmain a lo hlawhtling fo tawh. Astton Villa a enkawl tirh kha chuan Premier League table mawng lama talbuai an ni, season hmasa a zawh meuh chuan palina an ni - Champions League an khel phak dawn.

Goalkeeper Martinez chuan beisei an neih thu sawiin, "Kan ram Argentina tan nomawi chawi theih ang zawng zawng chu ka chawi tawh, club lamah pawh hlawhtlinna kan chan theih ka beisei, chumi beiseina ka neih avangin Villa Park-ah ka awm," a ti.

Argentina international Martinez hian tun hnai khan contract a ziak thar a, zaninah pawh Villa si ban nghaktu a ni leh ang. Arteta-a duhkhawp ni lo mah se khawvel goalkeeper ṭha berte zinga mi a ni tawh, a club hlui laka goal chhuah loh ngei a tum ang.

Villa hian an khingpui goal an nawr ṭhin, striker ṭha Watkins an nei bawk - England international hian tun season a match hmasa berah goal a khung lo; Gunners lakah khung a tum a, season hmasa Arsenal laka goal leh assist neitu Leon Bailey chu ven ngun ngai a nih a rinawm bawk.