New Economic Development Programme (NEDP) hnuaia sorkarin ruih theih thil laka ṭhalaite an fihlim theihna tura ruahmanna thar a siam, 'Project Himna – Mizoram Against Drugs, Alcohol and Tobacco (MADAT)' chu nimin khan chief minister Lal Thanhawla'n IPR directorate auditorium-ah a tlangzarh.

Chief Minister chuan, Mizoram chu kawng hrang hrangah inchhuanna tur nei mah se, thil ṭha lo leh duhawm lo lamah India rama a ber nihna an hauh thu sawiin, chu chuan nasa zawka hriselna kawnga hmalak a ṭulzia a tihlan thu a sawi a, "Vaihlo leh ruih theih thil dona thar MADAT duan a ni hi a lawmawm a, a hlawhtlin ngei ka beisei," a ti.

Lal Thanhawla chuan, state economy hmasawnna tura sorkar hmalaknate hlawhtling tak tak tur chuan mipui an hrisel a pawimawh thu sawiin, "Zirtirtute hi naupang kaihruai a, an nun hneh thei ber an nih avang-in zirtirtute'n nun an uluk a, role model ṭha an nih a pawimawh," a ti a; Mizoram hrisel siam turin a chhunga cheng tu pawh ṭanrual a pawimawh thu a sawi.

Ruihhlo leh ei leh in lama fimkhur loh vang-a cancer leh natna dang khirh tak tak Mizo zingah vei an tam thu te, mipat hmeichhiat-

naa inthlahdah vang leh ruihhlo vanga HIV/AIDS a hluar thute leh, naupang kumtlinglo khuaikhem vanga POCSO Act hnuaia case a tam thute sawiin CM Hawla chuan, "Hei hian insiamṭhat kan mamawhzia a tilang a ni," a ti.

Inkhawmah hian MADAT hmalakna puala Aizawl district chhunga sikul hrang hrangte project hming phuah intihsiakna buatsaiha a tiṭha zual pathumte hnenah lawmpuina thuziak leh pawisafai hlan a ni.

Lawmman dawngtute chu - pakhatna Lalruatfeli (Class-VI), Zuangtui M/S; pa-hnihna Lalruatfela (Class-VIII), Govt. M/S Samlukhai leh pathumna Lalrindiki (Class – VII), Govt. M/S-I Saitual an ni.

Project Himna – MADAT hi Aizawl district chhunga middle school chung lam sikul thlan bikah kalpui tur a ni a, mipui cheng zat tam avang leh ruih theih thil ti an tam avangin project enchhin nan Aizawl district thlan a ni.

Project hi Health department, School Education department leh Social Welfare department-te bakah, vaihlo leh ruihhlo dona lama hma latu tlawmngai pawlte nen ṭanghoin, Aizawl DC kaihhruaina hnuaia hmalakna a ni.

Hmalakna tur zingah, naupang zingah ruih theih thil vanga an chunga thil ṭha lo thleng thei hrang hrang zirtir te, sikula anti-tobacco/anti-drug abuse club din te, art competition buatsaih te, pamphlet, poster, sticker leh complaint board siam te, zirna in bul hnaia vaihhlo leh ruih theih thilte zawrh phal lo tura hmalakte leh zirlai nu leh pate zingah leh zirtirtute zinga vaihhlo nghei uar tura hmalakte a tel.

Inkhawmah hian Aizawl district-a sorkar leh private school 50-a zirtirtu thawk mekte tan training buatsaih nghal a ni.